Tare Da:
Aliyu
Muhammad Sadisu, Minna, Jahar Neja - Nijeriya.
(+234)08064022965, e-mail:aliyusadis@gmail.com
htt:// munbarin-musulunci.blogspot.com
Duk da bayanan da suka gabata na
zayyana wadansu abubuwa da akace masu tsarkine wannan ba yana nufin mutum ya
barsu a jikinsa ko tufafi ko kuma wurin zamaba, a'a, abin nufi anan ko da ka yi
sallah sai ka ga majina a tufafinka ba abinda ya taba sallarka, ko ka ga yawu,
amma wannan ba yana nufin kabar majina ko yawu a jikinba, tafta a musulunci ba
karamin matsayi take da shiba, anan za'a lissafo wadansu abubuwa kadan daga
cikin abinda addinin musulunci yace a tabbatar da tsaftarsu:
(1) Tsaftace Baki: Akan wannan
musulunci ya shar'anta asuwaki tun sama da shekaru dubu da dari hudu baya,
asuwaki yana tsarkake hakora da baki da dukkan wani datti da kazanta da ta
makale a hakori ko dasashi…'' wannan kuma ya shafi mace ya shafi namiji, bai kamata
mutum yana magana mutane suna kauda kai saboda warin bakinsa, Allah ya sawwake.
Ka ka manta hakoranta da bakin da magogaranka hanyoyine na fitar zancan Allah
wato Alkur'ani, saboda haka ka tabbatar da cewa ako da yaushe bakinka a
tsaftace yake. Ma'aikin –Tsira da amincin Allah su tabbata a gareshi- yana
cewa: ''Asuwaki abune da yake tsarkake baki, kuma yake sa Ubangiji ya yarda
da mutum''. Kuma yace ''Dabadin kada in tsanantawa al'umma ta ba da na
umarcesu da yin asuwaki a kowacce sallah''. Kenan sau biyar a kalla a
kowacce rana, Ma'aikin Allah ya kasance ko cikin dare ya tashi sai ya yi
asuwaki. Adunga fabatar da asuwaki a kowanne lokaci domin samun lada da kuma
tsaftace baki musamman lokacin sallah ta farilla ko nafi, maza ko mata, yara
kuma a koya musu su saba tun kafin su girma.
(2) Aske Gashi
Mara: Shine gashin-gaba (wanda yake fitowa gefan al'aura), addinin musulunci
ya karantar da aske wannan gashi domin samun cikakkiyar tsafta mace ko namiji,
bai kamata mutum ya bar wannan gashi a tare da shi ba har ya jima, akalla ace
acikin dukkan kwanaki arba'in mutum yana askeshi, akwai mai da ake sayarwa
wanda mutum zai iya amfani da shi, koma almakashi ko ma duna abinda zaka yi
amfani da shi wanda ba zai cutar da kaiba.
Wani sako da wannan gashi yake isarwa
kuma shine tabbatar da balagar wanda wannan gashi ya bayyana a gareshi/ta,
wanda hakan ke nuna cewa hukunce-hukuncen shari'a sun hau kanshi/ta ko bai yi
mafarkiba.
(3) Kaciya: Itace cire
fatarnan data rufe Hashafa, wannan kaciya tana kasancewane tun yaro yana
karami, domin yafi saurin warkewa, kuma zai tashi a siffa mafi kamala. Daga
cikin hikimomin ita kaciya: Tsarkake al'aura daga najasar da zata iya toshi
al'aura dadai sauran fa'idoji masu tarin yawa.
(4) Rage
Gashin-Baki: A tsari na addinin musulunci ba'a barin gashi-baki da yawa
kamar wani muzuru, ba kuma a shareshi baki daya rageshi ake yi matuka, sannan
kuma a bar gemu, wanda shi barin gemu babbar alamace ta banbancewa tsakanin
mace da namiji, Kash!! Amma haka zaka ga wani kullum sai ya askeshi ya kankare
wai shi dole yarone, ya dauka manyane kadai ke barin gemu.
(5) Yanke Akaifa
(Farce): Wannan yana daga cikin da Ma'aikin Allah ya fadakar da wannan al'umma,
a lokacin da ka/ki yanke farce ka gusar da dukkan wata kazanta ta zata iya
samun wurin zama, sannan kuma baka barshi ya yi zaro-zaro ba kamar na dabbobi,
abin mamaki haka zaka ga samari da wasu mata su sabawa wannan karantarwa ta
ma'aikin Allah wai suna ganin haka shine wayewa, Allah ya sawwake.
(6) Cire Gashin
Hammata: Abinda ake fi so shine 'tsigewa' duddacewa akwai zafi sai dai
hakan zai baiwa iska damar shiga wadannan kananan kofofi, amma ko da mutum ya
askene ba komai. Baya cikin tsari na addinin musulunci mutum ya bar gashin
hammatarsa buzubuzu macece ko namiji, tsari na musulunci shine askewa.
Wadannan bayanai da suka gabata na abubuwa shida, Ma'aikin Allah ya
karantar da wannan al'umma tsaftace su da gyarasu, mun kawo Hadisai akan na
farko wanda yake shine asuwaki, akan sauran biyar dinne Ma'aikin Allah ya ce:
''Abubuwa biyar
suna cikin tsafta a musulunci: Aske gashin mara da Kaciya da Rage gashin-baki
da Tshige gashin hammata da kuma Yanke farce'' Bukhari 5889
Muslim 257.
Wannan ya tabbatar mana da yadda musulunci yake kula da tsafta, domin
dubi yadda aka bayyana tsaftar gangan jiki, to haka yake idan mutum ya zo wanka
sai ya tabbatar ya wanke wadannan wurare ya kuma kurza domin kaucewa
makalalliyar kazanta.
Kuma addinin musulunci ya kwadaitar da sanya turare domin kasancewa
cikin yana yi mai dadi, ya kuma hana mutumin da yaci tafarnuwa ko albasa da
kada ya shiga cikin mutane, domin zai cutar da su da wannan warin na tafarnuwa
ko albasa ballantana taba (sigari).
Bayan wannan dole a kula da tsaftar gida kamar dakin kwana falo dakin
girki makewayi (bandaki) tsakar-gida a tabbatar da antsaftace su bai kamata
wurin da mutum yake kwana ya kasance ba tsafta babu yana yi na kamshi mai dadi,
ko kuma ka ga tsakar gida kaca-kaca ba shara babu tattara kayayyakin aiki wuri
guga, ballantaba bayi (makewayi) akwai magunguna da ake sanyawa a bayi bayan
anwanke shi domin kara tsaftaceshi koma kananzir aka zuba zai rage kaifin
bashin da bandaki yake da shi kuma zai rage kanan kwari sannan ma ga kafur da
idan aka sa zai tai maka.
Kammalawa: Daga wadannan
bayanan da suka gabata ya bayyana a fili cewar addinin musulunci addinine na
tsafta ba addinine na kazantaba, a tsaftace jiki da tufafi da wurin
zama/sana'a, domin yawan sutura daban tsafta kuma daba, zaka ga wani ba yawan
suturu yake da su ba, amma akwai wanki da guga da sa turare sai ka ganshi a
kullun abin sha'awa. Allah ya yi mana jagora.
No comments:
Post a Comment