TAKABA A MUSULUNCI

Gabatarwa:
Da sunan Allah Maiyawan rahama Mai yawan jinkai, tsira da amincin Allah su tabbata ga fiyayyan halitar Allah Annabi Muhammad, da SahabbanSa da Iyalan gidanSa amin. Muna son a wannan lokacin muyi bayanin yadda addinin musulunci ya haskaka duhun da duniya ta dade a ciki, ayayin yin takaba lokacin da mace megidanta ya rasu, ta yadda kowacce kabila take yi yadda ta tashi ta ga haka mutananta ke yi , a irin wannan lokacinne mata suke dan-dana kudarsu, domin suna kan wani tsari da Allah Madaukakin sarki bai turo wani Annabi da wannan tsarin ba. Ayau zamuyi kokarin fayyacewa tsanin zare da abawa ne, akan yadda takaba take a musulunci, da kuma irin gatan da musulunci ya yi wa mata. Asha karatu lafiya Allah yai mana jagora amin.

Mecece Takaba?: Takabadai itace" Zaman da mace zatayi bayan rasuwar megidanta, na wadansu kwanuka sanannu, batare da ado da kwalliya ba, ba kuma da yin wani aure ba, ko yi wa wani alkawari, ko sanya dukkan abinda zai ja hankalin wani ba, na tufafi ko kayan karau." Awanna bayani daya gabata zamu tsinkayi abubuwa masu yawa, wadanda kusan za mu bisu a hankali gaba-gaba domin fayyace su.(anan Takaba ta sha babban da Iddar saki, wadda muke fatan a wani lokaci muyi bayaninta, in Allah ya yarda).

Wacece mai yin Takaba?: Matar da zata yi zaman takaba, itace dukkar matar da mijinta ya rigamu gidan gaskiya, tana matarshi, sunyi saduwar aure ko busu yi ba. Anan zamu fahimci cewa muddin akwai igiyar aure a tsakanin su, to za ta yi takaba. Misali (Allah ya kiyaye) idan aka daura auren mutun da karfe 2:30 na rana, sannan bayan minti 30 ko awa guda ya rasu, to fa takaba ta ganta, kuma zata ci gadonshi, domin matar shi ce. Kamar yadda Abdullahi Dan Mas'ud Allah ya kara masa yarda, ya bada amsa lokacin da aka tanbaye shi, akace da shi : "Mutunne ya auri mace amma bai bayyana mata sadakinta ba, kuma bai sadu da ita ba har ya rasu? Sai Dan Mas'udin ya ce" Zan bada amsa da fahimta ta, idan na yi daidai to daga Allah ne, idan kuwa ban yi daidai ba to daga Shaidan ne, Allah da Ma'aikin Shi sun barranta da wannan amsar. Tana da sadakin mata ire-irenta, ba kari ba ragi, kuma za ta yi Takaba, sannan tana da gado". Sai Ma'akil Dan Sinan wanda yake daga kabilar Ashja'a ya mike yace: "Ma'aikin Allah tsira da amincin Allah su tabbata agare shi, ya yi irin wannan hukuncin da ka yi ga Rauh Diyar Washik –wata mace ce daga cikin mu, sai Abdullahi Dan Mas'ud yai farinciki da wannan Magana tashi" Imam Ahmad da Abu-Daud da Tirmizi da Nasa'i da Ibnu Majah suka ruwaito wannan hadisin, kuma Tirmizi ya Inganta shi.
Hakanan kuma inda mutun zai rabu da mai dakinshi da saki daya ko biyu, sannan ya rasu kafin ta kammala iddar saki, shikenan sai ta koma takaba, matarshi ce yana da dama yado da ita a ko yaushe muddin bata kammala idda ba.

Gwargwadon kwanakin Takaba: Alokacin da mutun ya rasu, to zaibar iyalin shi a dayan halaye biyu, kodai ta zama tanada Juna biyu ko kuma bata da shi. Idan bata da juna biyu to Takabarta itace "Wata hudu da kwana goma" Kamar yadda Allah yace cikin Suratul-Bakara "Kumma dukkanin mazan dake rasuwa daga cikin ku subar matansu, to matan za su zauna wata hudu da kwana goma" aya ta :234.

To amma idan ya rasu ya barta da juna biyu, a wannan lokacin karshen Takabarta shine ta sauke abinda take daoke da shi, koda ko ranar da ya rasu ne, Misali ya rasu 7:00 na safe ita kuma ta haihu 7:10 na safiyar, shi kenan ta kammala takabarta, idan wani ya gani ya ce yana so aka daura aure 2:30 na ranar aure ya dauru(ana karbar gaisuwa ana daurin aure) dalii kuwa shi ne. fadin Allah a cikin Suratut-Talak aya ta 4 " Kuma dukkanin mata masu juna biyu to lokacinsu shine su sauke abinda suke dauke dashi" da kuma Hadisin Subai'a Al-aslamiyyah, " Ita ta kasance tana auran Sa'ad Dan Khaulah, shi kuma ya fito ne daga gidan Amir dan Lu'ayy, yana daga cikin wadanda suka halarci gwabzawar Badar, sai ya rasu yabarta a hajin bankwana tana da juna biyu, bata ko jima ba bayan rasuwar shi saita haihu, a lokacin data kamma biki sai ta yi kwalliya, sai Abu-Sanabil Dan Ba'akk ya zo wurinta, shi kuma ya fito ne daga gidan Abduddar, sai yace da ita " Lafiya na ga kin cancara ado?, ko kina son ki yi aure ne? Na rantse da Allah lokacin auranki bai yi ba, harsai kin yi wata hudu da kwana goma.
Sai Subai'a ta ce "Yayinda ya fada min haka, maraice na yi sai na tattara kayana naje wurin Ma'aikin Allah tsira da amincin Allah su tabbata a gareshi, na tambaye shi hakan, sai ya ban amsa da cewa ai na kammala Takabata tun lokacin dana haihu, ya ban dama da inyi aure a duk lokacin da naga dama". Wanna hadisin Bukhari ya ruwaito shi, hadisi na 4909 da kuma na 5318, hakanamma Muslim da Abu-Daud da Tirmizi da Nasa'I, da Ibnu Majah. Inbu Shihab yake cewa : "Bana ganin akwai wani laifi idan ta yi aure lokacin data haihu, koda tana cikin jinin biki, saidai kawai mijin ba zai kusanceta ba sai ta yi tsarki.

To haka kuma idan yarasu ya barta da juna biyu na kimanin wata daya ko ma baikai haka ba, tofa sai ta haihu ka ga wannan Takabarta na neman wata tara koma fiye kenan domin dai sai ta sauka. Zai iya yuwuwa alokacin da maigida yarasu bata samma tanada juna biyu ba, wata kila a saduwarda bai huce masa saura minti 30 aduniya ba ta sami juna biyun, to kaga wannan zata fara lissafin kwanaki ne na Takaba sai daga baya Takabarta ta koma sauraran haihuwa, Allah ya sauketa lafiya shi kuma maigida Allah yajikan shi. Wannan ya nuna mana cewa mutun zai iya rasuwa ya bar matanshi, amma wata ta riga wata kammala Takaba, domin musulunci bai yadda a dauki dan wani gida akai wani gida ba, wannanfa ko da mace mai Takaba ta samu kwanciyar ciki, domin ciki yakan kai shekara 4 ko 6 kamar yadda malamai sukai bayani, duba Tafsirin Adhwa'ul Bayan Suratur-Ra'ad aya ta :8. Abinda ake nufi data sauka shi ne, ta sauke duk abinda ke cikinta, ya zo da rai ko bai zo da rai ba, saboda haka ko bari tayi ta kammala idda ko Takaba idan aka samu shaidu akan hakan, koma ace siffar mutun ta bayyana a tare da shi barin, idan mai Takaba ta haihu sannan ingantaccen bincike yanuna cewa tana dauke da 'ya'ya biyu ne kuma gashi ta haifi daya, tofa bata kammala ba sai ta haifi na biyun, domin abinda ake bukata ta sauke duk abinda take dauke da shi.

Yaushe za'a fara lissafin Takaba?. Za'a fara lissafin maitakaba ne daga lokacin da megida ya rasu, ba wai kamar yadda akebin al'ada ba wai sai ran juma'a, ko dako ya rasu ranar asabar, sannan ai mata wankan shiga Takaba, wannan kwata-kwata ba shi da alaka da addinin musulunci, sannan ace za'aba maitakaba wuka ko sanda, in zata shiga makewayi ta rike, kuma ta tafi a hankali wai mijinta na biye da ita, a firgita baiwar Allah. Saboda haka daga ranar da mijinta ya rasu daga ranar ta fara idda, yana rasuwa ta shiga Takaba. Saboda haka Malamai sun yi maganganu biyu, idan ya rasu bata sami labarin rasuwarshi ba, sai bayan wata hudu da kwana goma, ko bayan haihuwarta sannan ta sami labarin shikenan ta kamala takabarta, adaya daga cikin maganganun, Magana ta biyu kuma shi ne zata fara lissafi daga ranar da labari ya zo mata, in kuma bayan wata biyune da rasuwar shi ta sami labarin rasuwar shi. Sannan kuma babu wani wankan fita daga Takaba a mulunci, da zaran ta kammala wata hudu da kwana goma, ko ta haihu to ta kammala Takaba, saboda haka duk abinda ya haramta a gareta lokacin tana Takaba to yanzu ya halatta ta yi domin ta kammala takaba.

To me ya haramta ga maitakaba? A dunkule abinda ya haramta ga maitakaba shine 'Ado da kwalliya, da kuma yin aure ko yi wa wani al'kawari, ko fita ba tare da wani dalili na Shara'a ba. anan yana da kyau mu banbance tsakanin Kwalliya da Tsafta ya haramta ta yi kwalliya da ado, kamar sa Tozali, Kunshi, sa hoda yin dizayin janfarce janlebe, sanya tufafi na ado sa turare –indai ba bayan ta kammala al'ada ta diga shi akyalle domin tasa agabanta saboda rage karnin jiniba- da dai dukkan wani nau'I na ado ko kwalliya, koda ko rangada kitsone. Amma ita tsafta babu wanda ya hana maitakaba yin ta, yin wanka kullun yin kitso idan bukatar hakan ta taso ba kuma ayi don kwalliyaba, suma sun san na kwalliya kuma kun san wanda za'adan kakkama alallaba, kuma ya halatta ta yi wanki domin duk suna cikin tsafta ba kulliyaba, sannan ya halatta ta share dakinta ba ta zauna kamar wata mai haukaba, sannan dukkanin wadannan abubuwa babu wata rana da aka ajeye musu don gudanar da su, kamar ace 'sai juma'a ko laraba' za ta yi aduk lokacin da bukatar hakan ta samu. Anan nake cewa lallai akwai babbanci wanda ba zai yiwu ahadaba da irin yadda musulunci ya fayyace mana al'amura dalla-dalla ya haskaka mana su, da kuma irin yadda al'adu sukai kane-kane cikin harkar Takaba, Allah ya sauwake.

Kammalawa: daga dukkanin bayanan da suka sauwaka zamu fahimci irin gatan da musulunci ya yi mana shi, irin saukin da ya nema mana, musamman idan muka kalli yadda Allah ya tsara mana kuma muka kalli yadda ake yi a al'ada lallai zamu fahimci ya zama wajibi mu dada godewa Allah akan wannan ni'ima da Ya yi mana.

Aliyu Muhammad Sadisu,Kwakungu, bayan Ofishin 'Yansanda Minna, jahar Neja Nijeriya.
Za'a iya tuntuba a +2348064022965,
 ko kuma a Imei : aliyusadis@gmail.com
Ko  a yanar gizo, a :htt:// munbarin-musulunci.blogspot.com
Littafan da aka duba.
1- Alkur'ani Maigirma.
2- Tafsirin Ibnu Kasir
3-Adhwa'ul-Bayan Na Muhammad Amin As-Shankiti
4- Ahkamul-Kur'an Na Ibnul-Arabi
5- Fat'hul-Bari Na Ibnu-Hajar
6- Al-Mughni Na Ibnu Kudama
7- Taisirul-Allam Na Abdullahi Bassam.

RABUWAR AURE DA IDDAH A MUSULUNCI #2.

Gabatarwa:Bayanda a kasidar data gabata mukai takaitaccan bayani kan yadda musulunci ya tsara yadda ya kamata rabuwar aure ta kasance, da kuma yadda ya baiwa ko wanne bangare na ma'aurata 'yancinshi, da kuma yadda bayanai suka gabanata na cewa babu wani tsari da yayiwa mabiyanshi irin wannan tsarin inba musulunci ba. to ayau za muyi bayani abinda Allah Maigirma da daukaka ya sawwake mana na yadda Idda kuma zata kasance bayan anyi saki ko anrasu Allah yai mana jagora amin, asha karatu lafiya.
Kadan daga Hikimomin Idda.

Yana daga cikin hikimomin da Allah ya sanya cikin Idda kada adauki dan-wani gida akai wani gidan, domin idan mutun ya rabu da maidakinshi takan yiwu a wannan makon ansami juna-biyu, idan tai aure batare da yin iddaba bayan kwana biyu ko uku ko makamantansu da sakinta shikenan ta tauki dan-mijinta na farko ta kai gidan mijinta na biyu wanda yake wannan bakaramin zunubi bane da barna a harkokin zamantakewarmu, saboda haka musulunci ya tabbatar da cewa ba zatai aure na biyuba sai antabbatar da bata da juna biyu saboda haka aka shar'anta takaba, saidai kawai idan aka saketa kafin asadu to awannan lokacin babu wata Idda da zatayi, kamar yadda bayanai zasu zo nan gaba kadan idan Allah ya yarda. Haka kuma yana daga cikin Shar'anata Idda fatan bijin ya maida ita matar ta shi kafin ta kammala iddar idan sakin baikai ukuba, kamar yadda bayani ya gabata a makalar farko inda muka kawo fadin Allah Maigirma da daukaka " Baka saniba ana fatan Allah ya aiwatar da wani al'amari" Suratut-Talaq, aya ta 1, domin ba din da iddarba da shikenan kana sakinta yau gobe sai wani ya aura taimaka Fintinkau. Kazalika yana daga cikin manufofin yin Idda juyayin megidanta daya rasu ko dako basu taba saduwaba, kamar yadda bayani ya gabata arubummu metaken "Takaba a Musulunci". Saboda haka ko iyanan muka dakata kasan Allah Maigirma da taukaka ya sanya hikimomi masu tarin yawa cikin Idda, munsan su duka ko bamu sansu ba. Allah mungode maka.
Karkasuwar Idda a musulunci.

Idda ta kasu kashi biyu a musulunci, wato Iddar mamaci wacce muke ce mata takaba, da kuma Iddar Saki. Itadai iddar mamaci\Takaba mungudanar da bayanai akanta, saboda haka awannan karon bayanai zasu kasance ne kan "Iddar Saki"! Allah yai mana jagora amin,
Karkasuwar mata

Da farko yana dakyau mufahimci cewa mata sun kasu kashi-kashi lokacin da
zasu rabu da mazajansu, saboda haka ko dole iddarsu tasha ban-ban, anan zamu fahimci mutun zai iya rabuwa da matanshi biyu ko uku lokaci guda amma wata ta riga wata kamma Idda. Yanzu ga kasha-kashannasu :

(1) Mace me juna biyu : Alokacin da mutun ya rabu da medakinshi tana da juna biyu to ita Iddarta itace ta sauke abindake cikinta, ma'ana inda zai saketa da karfe 5:00 na yamma sai ta haihu karfe 5:20 na yammar shikenan ta kammala iddarta inta sami wanda zata aura aranar ya yi sai adaura auren da 6:00 na yammer. Yanzu ya zama dan-kallo, saidai kawai idan ya kuru Allah ya taimakeshi saki daya ne ko biyu, sai ya bogo fasta ya shiga cikin 'yan-takara wata kila ya samu ya kai labari. Allah yana cewa " Kuma wadanda suke da juna-biyu to lokacin (kammala Iddarsu shi ne ) su sauke abinda suke dauke dashi" Suratu-Talaq, aya ta :4, hakanan kuma inda zasu rabu juna biyunnata bai huce wata dayaba saidai ta haife abinda take dauke dashi, kamar yadda wannan bayanin ya gabata a ' Takaba a Musulunci' mun dan fadada bayanai a lokacin.

(2) Mace meganin Al'ada. Itakuma matar da take ganin al'adarta iddarta itace samun tsarki uku, saboda haka idan mutun ya rabu da maidakin shi, iddarta itace ta yi tsarki uku, shi kuwa tsarki uku ya sha ban-ban da wata uku, domin mace zata iya tsarki a kwanakin da suke kasa da wats uku, haka kuma zata iya iya tsarki uku a watannin da suke sama da haka, akwai matar da ashekara sau daya take yin al'ada to kaga wannan iddarta zata tasamma shekaru kenan. Allah yana cewa " Dukkani matan da aka sakesu zasu zauna da karankansu (suna jiran) tsarki uku" Suratul-Bakara, aya ta: 228 Idan kuma tana cikin lissafa al'ada sai ya bayyana tana da juna-biyu, to anan iddarta zata koma iddar mai juna biyu saitai zaman haihuwa (Allah ya sauke ta lafiya amin).

(3) Mace mara ganin al'ada. Matan da basa ganin al'ada sun kasu kashi biyu, kashi na farko: basagin al'adane saboda yarinta ma'ana batakai lokacin al'adaba gashi mijinta ya rabu da ita, sai kashi na biyu :wadanda basa ganin al'ada saboda tsufansu don sun wuce lokacin al'ada. To wadannan matan da basa ganin al'ada ko saboda karancin shekaru ko kuma saboda angirma, iddarsu itace su lissafa wata uku. Alllah Madaukakin sarki yana cewa " Kuma matayen da suka debe tsammani daga al'ada daga matanku idan abin ya rikice musu to iddarsu itace wata uku, da kuma ma wadanda basu fara ba" Suratut-Talaq, aya ta :4.

(4) Macan da ka rabuda ita kafin Tarewa. Ita matar da aka rabu da ita kafin su san junansu ita da mijin, babu wata idda da zata yi, kawai inta sami wani alokacin sai adaura aure, (sabanin rasuwa idan rasuwa mijin ya yi kafin su tare za tai takaba). Domin Allah yana cewa " Ya ku wadanda sukai Imani, idan kuka auri mata mummunai sannan kuka sake tun kafin ku sadu da su, ba ku da wata idda a kansu (matan) da za su yi" Suratul-Ahzab, aya ta :49.
Kammalawa. Ina fatan cikin wannan dan takaitaccan bayanan da suka gabata sun dan warware mana madansu al'amurran da suka shafi Idda, da kuma irin yadda musulunci ya haskaka mana rayuwarmu. Ni ina bada shawara ga dukkan wanda wadansu al'amurran addini suka shamasa kai, da kada yai kasa agwiwa ya garzaya makaranta ya yi tanbaya, masu iya maga suce 'Tambaya mabudin ilimi, amma azauna haka ko unkula gaskiya ba zai haifadda Da me ido ba, kuma wadansu hakkokinshi da damar da musulunci ya bashi ba zai sansu ba. Allah yai mana jagora kuma ya tabbar da dugadugammu kan wannan addin amin.

Aliyu Muhammad Sadisu,
Kwakungu, bayan Ofishin 'Yansanda Minna,
 jahar Neja Nijeriya.
Za'a iya tuntuba a  08064022965, 
ko kuma a Imei : aliyusadis@gmail.com
Ko a ziyarcemu a yanar gizo, a :
htt:// munbarin-musulunci.blogspot.com

RABUWAR AURE DA IDDAH A MUSULUNCI #1

Gabatarwa:Da sunan Allah Maiyawan rahama Mai yawan jinkai, tsira da amincin Allah su tabbata ga fiyayyan halitar Allah Annabi Muhammad, da SahabbanSa da Iyalan gidanSa amin. A wannan karan zamu gudanar da bayani ne kan yadda Addinin musulunci ya tsara yadda za'a gudanar da saki, batare da ancutar da Mata ko miji ba muddindai anbi wannan tsarin. Da zaran ance saki sai gaban namiji ko mace ya fadi, ko menene dalili? Musulunci bai shara'anta sakiba don cutar da wani ban gare, asalima musulunci ya shar'anta hakanne don ceto su daga muwuyacin hali, yana daga cikin rahamar musulunci tabbatar da saki, domin yana daga cikin mizar musulunci bai yadda a cutar da kowa ba, saboda haka idan akace a zauna babu maganar cewar akwai rabuwa ga duk wanda yaga anzalince shi kuma ya yi iyakar hakurin da zai iya yi, to wannan zai ba abokin zamanshi cewar shimafa yana da gata a musulunci, da yawa akan sami na miji yana dandanawa iyalin shi azaba, to yanzu sai kace yaya?, ko kuma matar tana gasawa maigidanta aya a hannu, to ananfa dole ne asa ido domin tabbas wani na matukar cutar da dan'uwansa kuma asan wanna mataki za'a dauka, amma musulunci tuni ya dauki matakai daba-daban domin shawo kan al'amarin tun kafin yakai ga rabuwa.
Kandagarkin da musulunci ya yi.

Lalle ne musulunci ya yi kandagarki don hana rabuwar aure, ta yadda ya umarci dangin miji dana mata dasu tura wakilai guda-daga daga kowane bangare na miji da mata a lokacin da suka ga cewa lalle ka akwai sabani tsakanin wance da wane, su wadannan wakilai zasu nazarci dukkan bangarorin biyu su kuma yi kokarin daidaita al'amarin. Allah yana cewa " Idan kuka ji tsoron sabanin dake tsakanin su (miji da mata) to ku tura wani mai hukunci daga dangin sa da kuma mai hukunci daga danginta, muddin sukai nufin gyara to Allah zai daidaita tsakanisu"! Suratun-Nisa'I, aya ta :35. sanan Allah yana cewa adai cikin wannan Surar a aya ta 128 " Sulhu dai shine mafi alheri" sabo da haka a wannan bayani ya nuna mana lalle musulunci ya kula da dukkanin bangarori biyu (mata da miji), domin ganin kada rabuwa ta auku, saboda haka yana da 'yau mutun ya iya daurewa akan wani hakkinshi ya dan sassauto domin ganin ansami daidaituwa, domin daidaituwa ta fi rabuwa muddin ba akan asabawa Allah da Ma'aikinShi bane. Sauda da yawa mata sunyi hakuri da wani hakkinnasu kamar yadda mazan suma sukai hakuri da nasu domin ganin aure ya tabbata, masu iya Magana na cewa 'Tsakanin harshe da hakorima ana sabawa' wai 'zo muzauna zo musaba' saudayawa wadansu abubuwan basukai atada jijiyar wuya ba sai kaga za'a ba hammata iska, Allah ya sawwake.

Adadin Saki!
Idan Allah ya kaddari sai an rabu tofa ba makawa sai hakan ya faru, to amma ya addinin musulunci ya tsara yadda sakin zai kasance? Kafin zuwan addinin musulunci mutanan jahiliyya sun kasance suna sakin mata yadda suka dama
ba wani adadi, sannan idan mijin ya ga ta kusa kamma idda sai ya dawo da ita, wannan ba sau daya ba, ba kuma sau biyu ba, yazamana suna azabtar da mata akan wannan mummunar al'ada, sai mace ta zauna shekara-da- shekaru ita ba mai mijiba kuma ba kuma mara mijiba, domin idan ya saketa ta kusa kamala idda sai ya dawo da ita, idan aka dan kwana biyu sai ya sake sakinta, da musulunci ya zo sai yai wa tufkar hanci, domin gallazawa mata a irin wannan bai kamata ba, musulunci yace ' Sakin da zai yiwu ai komai akanshi karo biyu ne' Suratul-Bakara, aya ta :229. anan sai aka nuna mana mutun zai iya sakin medakinshi kuma ya iya yin kome karo biyu, anan wata hikima ta musulunci sai yace saki sau biyu, domin ya nuna maka cewa abin da akafi so shine kayi daya sannan kasake yin dayan domin idan kai biyun lokaci guda tofa damarka ta kome daya ce ba biyuba, sabo da haka har idan ya zama ba makawa to sai kai dayan domin wata damarkace ka ajema kanka. Idan kai kake da laifi zaka gane idan kuma ita ce zata fadaka, idan ba hakaba sai ka kara gudan wani lokaci ya zama biyu kenan, to daga nan sai kowa ya shiga taitayinshi ya kuma kula da hakkokin da musulunci ya dora akan kowannensu domin ana kara saki na uku to ba kome ba biko sai kuma wani jikon, domin sai ta kammala idda ba kuma a gidanshi ba, sannan sai ta auri wani mijin ya dan-daneta ta dan-daneshi tasu ta hadasu sun rabu ko ya rasu sannan ya fito cikin 'yan-takara, dirkashi! Domin Allah maigirma da daukaka yana cewa " To idanfa ya saketa (saki na uku) bata halatta a gareshi hassaita auri wani mijin da ban" Suratul-Bakara, aya ta : 230. Kuma bayani ya tabbata daga Ma'akin Allah cewa saisun dan-dani juna. idan kai laka'ari ai anbashi damar yabi a hankali amma yai gaggawa, zaka ga wani duka biyun yake yi lokaci guda wani ukumma kwata-kwata kenan (malam mai gaba daya) sannan ya zo yana neman wai malamai su yi mishi fatawar yiwuwar dawo da ita, dankari!. Yanzudai saki ya auku to menene abinyi?
Idda

Idan sakin da akai bai wuce daya ko biyuba to matar zatai iddar ta ne a dakinta, bai halatta miji ya fitar da ita daga dakin, balle har ya watso mata kayan ta waje ko ya dakko mota akwashe mata kayanta, ko kuma ita tace ai tana da gidan ubanta bari ta tafi da dai sauran irin wadannan kazaman maganganu da musulunci bai amince da su ba, Allah Yana cewa " Kada ku fitar da su daga dakunan su, su kuma kada su fita sai dai idan sunzo da wata alfasha bayyananniya, dukkan wadannan dokokin Allah ne kada ku ketare su, dukkan wanda ya ketare dokokin Allah tofa hakika ya zalinci kanshi" Suratut-Talaq, aya ta :1, to anan zakaga lalle irin yadda ake gudanar da rabuwar aure hakika abin yana bukatar gyara sosai wannan fa gamu musulmai da muka yadda da dokokin da Allah ya dora mana, ya Allah ka yafe mana, kuma ya Allah kada ka kamamu da abinda wawayencikimmu suka aikata, amin. Me cece hikimar yin hakan mace tai idda a cikin dakinta?
Hikimar Idda a dakin aure.

Lalle ne dukkan abinda Allah madaukakin Sarki ya tsara mana akwai hikimomi da alherai masu yawa agaremu munsani ko bamu sani ba, kuma ba'a dora mana cewa dole sai munsan hikimar hakan kafin mu ai watar da abida aka umarce mu. Tabbas mutuminda ya rabu da medakinshi ta hanyar saki yada ko biyu, matar shi ce fa , domin inka lura ai ba zaka bar wani ya zo zawarciba, inkuma ka rasu a wannan lokacin kafin ta kamma idda zata gajeka, kuma zatai maka takaba (kamar yadda ya gaba a makalarmu metaken Takaba a musulunci) to anan tunda tana Idda a gidanka zaka dawo da ita aduk lokacin da kaso ba tare da ansake daura aureba domin bata kamala Iddaba, kuma ba saika ta tuttura masu bikoba, wannan shi ne ma'anar fadin Allah daya ke cewa "Baka sani ba ana fatan Allah ya kawo wani sabon al'amari" Suratut-Talaq, aya ta :1, to amma sai wannan damar da Maigirma da daukaka ya bamu itama ana wasa da ita, bayan da mutun ya sabawa Mahaliccin shi sannan matar tana nema ta gagareshi, galibi kuma alokacin ba wacce yake so inba itaba, dabara kaga tana neman ta karewa kada. Saidai kamar yadda ishara ta gabata a baya matar da zatai idda a dakinta itace matar da saki daya ko biyu ya rabasu amma matar da saki ukune nan ba magar yin idda a dakinta, saigida!. Saidai akwai abin tanbaya anan shin akowanne lokaci ya halatta mutun ya rabu da medakin shi?.
Lokotan Saki da musulunci ya amince da su.

Anan nake ceawa lalle yana daga cikin irin gatan da musulunci ya nuna mana cewa ba'a sakin mace lokacin da take cikin al'ada. Kuma idan mutun ya aiwatar da sakin ta saku kuma dole ya mayar da ita cikin matanshi, inyaki kuma alkali ya hukunta shi, sabo da Sayyidina Umar Allah ya kara masa yarda ya tambayi Ma'aikin Allah Tsirada amincin Allah su tabbata agareshi, cewa danshi Abdullahi ya saki matar tana ckin al'ada. Sai Ma'aikin Allah ya umarci Sayyidina Umar daya umarci dannashi Abdullahi ya dawo da ita, sannan tana karkashinshi hassai ta kammala wannan al'adar ta sakeyin wata ta kammala sannan in yaga yiwuwar ya saketa sai ya saketadin, kuma aka lissafa wannan sakin cikin sakinna shi, Bukhari ya ruwaito wannan hadisin kuma shine hadisi na : 4908, 5252 ,5253 da Muslim. To idan mutun ya saki matarshi shikenen ba dai za'a raba kirki da itaba, ma'ana bata cikin matan da za'ai karba-karban girki da su, to haka za'a kyaleta? A'a za'a bata :
Kwabo kashewa.

Yana daga cikin hakkin dukkar matar da mijinta ya saketa da ya bata kwabon batarwa, wannan shine malamai suke kira Mut'atuttalaq, domin zata sai sabulu omo katin waya da dai sauransu, musulunci bai kayyade gwargwadon nawa za'a bayarba saidai ya fadi a wurare da dama kowa zaiyine daidai karfinshi, sabo da haka mutumin da yake da damar yaba wacce ya saka Naira dubu 40, misali sai yabata N 10,000, wannan bai yiba sai ya cika ko ta kaishi koto, haka kuma mutumin da bashi da karfin haka baya taba halatta a tilasta mishi sai ya bayar da hakan, musulunci cewa yayi kowa daidai karfin shi, Allah yana cewa cikin Suratul-Bakara aya ta :236 "Kuma ku jiyar da su dadi, me yalwa gwargwadon karfinshi, kuma mara yalwar arzikima gwargwadonshi" ayoyi akan baiwa matar da aka saka kudin kashewa sun memetu a wannan surar aya ta :241 da Suratul-Ahzab,aya ta :28 data 49, duk wadannan suna daga cikin dinbin ayoyin Alkur'ani mai girma da suke ceto mata daga cikin bakin kangin da suka sami kansu a tsarin da bana musulunci ba. kasancewar al'amarin rabuwar aure ba haka yake sakakaba. Kamar yadda alokacin daurin auren saida aka sami shaidu to hakama lokacin rabuwar saida musulunci yabada umarnin.
Shaidawa Dattijai biyu

Abin sanine cewar Dattijai yana nuna mutanan kwarai mutane masu mutunci masu yawan shekaru ko masu matsakaicin shekarune muddin sunkai shekarun girma da sanin ya kamata, saboda haka musulunci yabada umarni shaidawa akalla Dittijai biyu domin tabbatar da saki nawa akai kuma nawa ya rage, amma inba hakaba sai aita gardaddami akan nawa ya auku kuma nawa ya ragedin, Allah Maigirama da daukaka yana cewa " Kuma ku shaidawa Adilai biyu daga cikinku, ku tsayar da shaidar domin Allah" Suratut-Talaq, aya ta:2. to kan lalle akwai kulawar musulunci cikin dukkanin motsi da juyi da Dan-adam yake yi, ya Allah ka tabbatar damu akan wannan addini naka amin.
Kome \ Biko.
Kome kamar yadda bayanai suka gabata yana kasancewa ne lokacin da mutum ya rabu da medakinshi ta sanadiyyar saki daya ko biyu, anan mutun ke kokawar yaga ya mayar da matarshi, amma idan ya kasance sakin saki ukune to kan ai ba maganar biko balle kome. Shi wannan al'amari na kome yana faruwane kafin matar ta kammala Idda, amma idan ta kammala Idda tofa saidai da sabon aure tunda sakin baikai ukuba, amma indai ya kai uku to sai ta yi sabon aure, saboda haka tunda saki dayane ko biyu kuma ta kammala idda bai dawo da itaba to yanzu sai ya fito cikin 'yan-takara, idan Allah ya sa ya kai labari to idan kuma ya sha kaye sai hakuri. Amma idan bata kammala Iddaba to mijin shi ke da damar ya mayar da ita ba tare da wani ya yi kaka gida cikin lamarinba muddindai sunyi nufin gyara(wato miji da mata) Allah Maigirma da daukaka yana cewa "Kuma mazajansu sune mafi cancantar su mayar da su (matansu) matukar sunyi nufin gyara" Suratul-Bakara, aya ta : 228, wannan shike nuna cewa duk lokacin da miji ya mayar da matar muddin akwai nufin gyara babu wani ta koma kawai.
KammalawaDaga dukkanin bayanan da suka gabata bayanai sun bayyana karara na gata da jinkai da musulunci ya yi mana, domin babu wani tsari a duniya da yake da irin wannan al'amari filla-filla ya fayyace tsakanin zare-da-abawa, musammamama mata, domin zakaga duk wani tsari da ba musulunci ba to bautar dasu yake kai tsaye ko a fakaice, amma lalle musulunci ya yi mata gata saidai idan ta jahilceshi wannako babbar cuta ce, Allah ya tsaremu amin.
Aliyu Muhammad Sadisu,
Kwakungu, bayan Ofishin 'Yansanda,
Minna jahar Neja Nijeriya.
Za'a iya tuntuba a  08064022965,
 ko kuma a E-mail: aliyusadis@gmail.com
Ko a ziyarcemu a yanar gizo, a :
htt:// munbarin-musulunci.blogspot.com

HUKUNCE-HUKUNCEN 'RANTSUWA' A MUSULUNCI !

Gabatarwa : Dasunan Allah Mai yawan rahama maiyawai jinkai, tsira da amincin Allah su tabbata ga fiyayyan halittar Allah Annabin tsira Annabi Muhammad, da Iyalan shi da Sahabban shi baki daya. Bayan haka a wannan karon za mu karkata akalar mu zuwa wani bangaran daban na rayuwa , wannanan bangaran kuwa shi ne na Rantsuwa! Domin mu ga yadda musulunci ya tsara mana wannan al'amari, kuma wannan zai dada nuna mana cewa musulunci yana da ruwa-da-tsaki cikin dukkanin al'amurammu, a wannan karon bayanai za su zo game da yadda ake rantsuwa da kuma hukuncin ta da yadda halin wanda ya yi rantsuwar zai kasance da kuma abinda zai biyo baya bayan mutum ya kasa a binda ya yi rantsuwar a kan shi cewa zai yi ko kuma ba zai yi ba, da kuma matsayin rantsuwar mu ta yau da kullum, da dai sauran bayanai da suka shafe mu, muna rokon Allah da sunayan shi kyawawa da suffofin shi madaukaka da ya yi mana jagora amin.

Tabbatuwar Rantsuwa a shara'a: Lalle rantsuwa ta tabbata a Littafin Allah Mai tsarki Alkur'ani da kuma Hadisan Ma'aikin Allah da Ijma'in malamai akan haka. Amma a alkur'ani Allah yana cewa "Allah ba zai kama ku da rantsuwar wargi ba sai dai zai kama ku da abin da ku ka kudurce na rantsuwa" Ma'ida, aya ta : 89, kuma Allah mai gaima da daukaka ya umarci Annabin shi a wurare uku cikin Alkur'ani mai girma akan ya yi Rantsuwa, Allah yake cewa " Kuma suna neman labarinka akan al'amarin gaskiya ne kuwa? Ka ce : Eh, na rantse da Ubangiji na lalle tabbas gaskiya ne" Suratu Yunus, aya ta 53. wuri na biyu kuma Allah yana cewa "Kace :A'a, na rantse da Ubangiji na sai ta zo muku" Suratu Saba'I, aya ta 3, wuri na uku cikin Suratut-Taghabun aya ta 7, Allah yana cewa "Kace :A'a, ina rantsuwa da Ubangiji na lalle sai an tayar da ku". Wadan nan sune wurare uku da Allah ya umarci Annabin shi Annabin tsira da ya yi wa wadannan kafiran rantsuwa akan lallefa alkiyama zata zo, dubi sabo da tsananin karyatawar su da aukuwar ranar sakamako sai da Allah ya umarci Manzan shi da ya yi musu rantsuwa har a wurare uku, lalle wannan yana nuna mana halaccin yin rantsuwa idan bukatar hakan ta auku, haka namma ya tabbata Ma'aikin Allah yana cewa "Lalle ni ina rantsewa da Allah – in Allah ya yarda – ba zan yi wata rantsuwa ba sannan in ga sabanin haka shi ne mafi alheri face sai na aikata abinda yake shi ne mafi alheri na warware rantsuwa ta" Bukhari da Muslim suka ruwaito, wannan shi ma ya dada fito mana da tabbatuwar rantsuwa domin Ma'aikin Allah yana yi, kuma yana dada nuna mana halaccin warware rantsuwa idan daga baya mutum ya fahimci hakan shi ne mafi alheri ba wai ya toge akan rantsuwar shi ya fake da ita da an bashi baki yace 'ai na rantse' domin Allah ya hana mutun ya sanya rantsuwar shi ta zama wani shamaki tsakanin shi da aikata ayyuka na alheri kamar sadarda zumunci ko taimakon mabukaci Allah yana cewa "Kada ku sanya Rantsuwa da Allah ta zama wani shamaki don ku ki yin aikin alheri kuma ku ki yin takawa kuma ku ki yin sulhu tsakanin mutane" Suratul-Bakara domin akwai mutane masu yin irin wannan dabi'ar nan da nan zai yi rantsuwa domin da ance ya yi hakuri sai yace ai na rantse. Kuma malamai sun yi Ijma'I akan tabbatuwar rantsuwa a musulunci.

Hukuncin Rantsuwa: A salin Magana yin rantsuwa halas ne idan bukatar hakan ta taso, koda yake yana zama wajibi a wani lokaci, ba mutum ya mayar da ita ako da yaushe ba domin wani mutumin kuma muddin zai yi maga daya ko biyu sai ya yi rantsuwa har a wayi gari rantsuwar ba komai bace awurin shi to irin wannan halin musulunci bai yarda da shi ba ya kyamace shi domin ya hana a yarda da mai yin irin wannan rantsuwar Allah yana cewa "Kada ka bi dukkan mai yawan rantsuwa, wulakantacce." Suratul-Kalam, aya ta 10.
Da wa ake rantsewa? Ana rantsewa da Allah mahalicci ne kadai, dudda cewa shi Allah madaukakin sarki yana da ikon ya rantse da dukkan abinda ya ga dama babu wanda zai ce da shi damme (Tsarki ya tabbata ga Allah) saboda haka Allah ya rantse da abubuwa da yawa Kamar rayuwar Manzan Allah kamar rana da wata da dare da sama d.s, ba ya halatta a rantse da dukkanin wani abin halitta, akan haka ba ya halatta da sama ko kasa ko mala'ika ko wani annibi daga cikin Annabawan Allah tsira da amincin Allah ya tabbata a gare su ko da kabari ko da kwarankwatsa wasu suce tannatsa ko gajimare ko ma dai meye, Ma'aikin Allah tsira da amincin Allah su tabbata a gare shi ya riski Umar Dan Khaddab a cikin ayarin matafiya yana rantsewa da iyayan shi, nan danan Ma'aikin Allah ya kira su ya ce "Lalle kusaurara hakika Allah yana hana ku da ku rantse da iyayan ku, kuma dukkanin wanda ya kasance zai yi rantsuwa to ya rantse da Allah ko kuma ya yi shiru" Bukhari ya ruwaito shi a hadisi na 679 da 6646 Muslim a hadisi na 1646 Abu-Dauda hadisi na 3249 Tirmizi 1534 duk wadannan malaman sun ruwaito wannan hadisin cikin littafan su. To idan mutum ya rantse da wanda ba Allah ba ya rantsuwar take? Amsa anan ita ce: al'amarin yana da fuskoki biyu, fuska ta farko idan ya yi hakan akan rashin sani sai yanzu ya sami bayani to wannan ana fatan Allah ba zai kama shi da wannan laifi ba, fuska ta biyu ita ce mutum ya aikata hakan yana sane to abubuwan da za su biyo baya za su zama kamar haka: abu na farko ya sabawa Ma'aikin Allah tsira da amincin Allah su tabbata a gare shi, kuma kowa ya san irin danyan laifin dake cikin sabawa Ma'aikin Allah domin ana jin tsoron kada mutum ya samu kan shi ba cikin mabiya ma'aikin Allah ba ranar Alkiyama Allah ya tsaremu, abu na biyu ya aikata laifi mai zaman kanshi domin yana daga cikin laifuffukan dake sa zuciya ta yi tsatsa, abu na uku rantsuwar bata kulluba (ma'ana ba rantsuwa bace) sabo da haka ya zama dole ai hattara daga irin wadannan al'amurra da kuma neman gafarar Allah, Allah ya gafarta mana amin.

Karkasuwar Rantsuwa: Anan malamai sukan karkasa rantuwa zuwa kashi-kashi, zamu ambaci kashi uku da hukunce-hukuncensu daga cikin kasha-kashan rantsuwar domin galibi wadannan ukun su mukafi cudanya da su lokacin yin rantsuwa Allah ya bamu sa'a amin.

Kashi Na Farko: Rantsuwar wargi. Wannan ita ce rantsuwar da malai suke kiran ta Yaminul-Laghwi. Malaman sun karawa juna sani wurin me ake nufi da Rantsuwar wargi ko yasasshiyar Rantsuwa? Wasu suka ce :Ita ce irin rantsuwar dake guda a bakuna ba tare da angudurta nufin rantsuwar a zuciya ba, kamar: Wallahi ba haka bane, ko Wallahi haka ne. wasu kuma suka ce ita ce: rantsuwar da mutum ya kan yi akan tabbas abinda ya rantse a kan shi daidai ne sai daga baya abin ya bayyana ba haka bane, misali: ka hango wani mutum daga nesa sai ka rantse da Allah waccan mutumin wane ne, domin ka kalli tsawon shi da tafiyar shi da komai na shi, sai bayan ya matso kusa sai ya bayyana ba shi dinne ba, wannan ko yakan auku sosai(akwai lokacin da naje sakkwato zuwa na nafarko kenan akaita maraba da ni ana cewa Aliyu ka zaka sai nake ta mamaki ashe a inda na sauka din akwai wani ya yi tafiya shima sunan shi Aliyu wai mun yi kama sosai) wadannan nau'uka biya na rantsuwa mukan sami kammu a ciki kwarai da gaske, to irin wannan rantsuwar tana da Kaffara? Irin wannan rantsuwar bata da wata kaffara domin Allah bai kama wanda ya yi ta da laifi kamar yadda Allah ya ke cewa "Allah ba ya kama ku da laifi saboda yasasshiyar rantsuwowin ku." Suratul-Bakara, aya ta :225. (wato rantsuwar wargi) kamar yadda bayanin ta ya gabata.

Kashi Na biyu :Rantsuwa mai halakarwa. Wannan kashi na biyu da zamu yi bayanin shi yanzu shi ne malamai suke kiran shi Al-Yaminul-Ghamus, wato rantsuwa me halakarwa. Wannan ita ce: Rantsuwar da mutum zai yi ta akan karya domin cin hakkin wani. Wannan zai nuna mana dukkan wata rantsuwa akan karya da mutum zai yi domin ai anfani da wannan rantsuwar a bashi hakkin wani ko aba wani hakkin wani ita ce ake Magana a yanzu, misali:Mutum ne yake so ya dirkake fegin wani ko gona koma dai menene ya tsaya tsayin-daka da rantsuwa domin a bashi wannan fegen ko wannar gonar, ko kuma ya kira wani ya rantse a matsayin sheda domin a bashi shi kuma wanin ya rantse. To me nene hukuncin haka? Abinda ya kamata a sani dukkan wani hukunci da alkali ya yanke a kotu baya halatta haram ko ya haramta halal, saboda haka idan alkali ya yi iyakar binciken shi ya zamana abinda ya binciko shi ne wannan fegi naka ne alhali ba naka bane kotu ta dauka ta baka akan abinda ta dogara da shi na shaidu to wannan hukunci baya halatta wannan fegi a wurin Allah wanda yake masanin boye da sarari. Abu na biyu kuma irin wannan rantsuwa ba'a mata kaffara domin ta wuce haka bala'inta ya kai bala'I, ita dai kan sai idan mutum ya tuba yayi nadama ya kuma ci gaba da neman gafara wurin Allah ya kuma yi niyyar ba zai sake aikata wannan mummunan aiki ba ya kuma mayarwa me kaya kayan shi ya kuma ci gaba da istigfari muna fatan Allah ya yafe mishi, amma irin wannan rantsuwa ai ba maganar kaffara dirkashi! Ah, idan kaffara kawai zata biya ba sai mutum ya kamfato makudan kudi ba ya zo ya rantse in an bashi ya je ya dauki abinda bai kai dubu goma ba ya yi kaffara da su shikenan ya sha. Saboda irin girman da wannan rantsuwar take da shi Ma'aikin Allah tsira da amincin Allah su tabba a gare shi ya ke cewa "Dukkan wanda ya yanki hakkin wani mutum musulmi da rantsuwar shi to hakika Allah ya wajabta mishi wuta kuma ya haramta mishi Aljanna" Muslim ya ruwaito shi, kallaci irin narkon azabar da Ma'aikin Allah ya yi bayanin ta cikin wannan hadisin ka kuma kalli yadda ake fafutukar aga antara koma ta halin kaka ne Allah ya sawwake, abin la'akari anan shi ne da Ma'aikin Allah ya :'Hakkin mutum musulmi' ba ana nufin na wanda ba musulmi ba ya halatta a'a na dai musulmi shi ne bala'in ya fi, Allah ya kare mu da kariyar shi amnin summa amin summa amin.

Kashi Na uku ; Rantsuwar da ake wa Kaffara. Wannan ita ce malamai suke kira; Yaminul-Kaffara wato rantsuwar da idan mutum ya warware ta (wato karya ta) zai yi kaffara, wannan ita ce dukkan rantsuwar da mutum ya yi da Allah akan zai ai kata abu kaza sai kuma ya fasa aikatawa, ko ya rantse ba zai aikata ba sai kuma daga baya ya zo ya aikata. Sai dai malamai suna anbaton sharudda uku kafin hakan, sharadi na farko ya zama ya kudurce rantsuwar azuciyar shi ya yi niyya kenan, domin idan ba haka ba ta zama ya sasshiyar rantsuwa ke nan wacce bayanin ta ya gabata wacce ba za ai mata kaffara ba, sharadi na biyu ya zama alokacin yin rantsuwar baice 'In Allah ya yarda ba' domin idan ya ce In Allah ya yarda kuma ya fadi hakan ne har zuci ba iya fatar baki ba sannan bai sami damar aiwatar da abinda ya yi rantsuwa akan shi ba wannan ma ba wata kaffara akan shi, sai dai kamar yadda aka ambata ya zamana ya ce hakan harzuciyar shi ba kawai mutum ya fadi iya fatar baki ba. sharadi na uku ya zama ya hada rantsuwar da In Allah ya yarda (wato In sha Allah) amma idan sai da ya yi rantsuwar sannan daga baya ya ce in Allah ya yarda to wannan bazata kange shi daga kaffara ba idan ya warware rantsuwar. Wadanan su ne sharuddan da malamai suke ambatawa da suke kare mutum daga yin kaffara. To amma idan mutum ya rantse ce ba zai aikata abu kaza ba sai ya aikata da mantuwa ya hukuncin shi? Idan har akan mantuwa ya aikata babu wani abu a kan shi domin Allah baya kama wanda ya aikata hakan da mantuwa sai dai idan da ganganci ne domin muna yin addu'a lokacin karanta amar-Rasulu muna cewa"Ya Allah Ubangijimmu ! kada ka kama mu da abinda mukai da mantuwa ko mukai kuskure" Suratul-Bakara, aya ta karshe, kuma ya tabbata a hadisi ruwayar Muslim cewa Allah ya ce "Hakika na aikata"(ma'ana ya karba mana addu'ar). Saboda haka dukkan mutumin da ya yi rantsuwa akan ba zai yi abu kaza ba sai kuma ya aikata da mantuwa to babu wata kaffara akan shi, har ma da mutumin da ya rantse ba zai yi kaza ba ko kuma ya rantse sai ya yi kaza, sai aka tilasta shi da karfin tsiya to shima babu komai akan shi misali ya rantse ba zai shiga gidan wane ba sai aka sami samari majiya karfi suka dauke shi cancakat suka sa shi cikin gidan ko kuma ya rantse ba zai fita ba aka sa samarin suka fitar da shi da karfin bala'I ko kuma suka zane shi ko ma suka ce za su kasha shi, shi ma babu wata kaffara akan shi, dalili kuwa shi ne fadar Ma'aikin Allah tsira da amincin Allah su tabbata a gare shi "An yafe wa al'ummata Kuskure da Mantuwa da Dukkan abinda aka tilasta su akai" (dud da cewa malaman hadisi suna maganganu kan wannan hadisin) sai dai akwai ayar suratun-Nahli aya ta 106 fadin Allah mai girma da daukaka "Dukkan wanda ya kafirce ma Allah bayan ya yi imani (da Allah din) sai dai kawai wanda aka tilasta shi…" shi ne malamai suke cewa atilasta mutum ya kafirce wa Allah amma Allah ya ce bai kafurta ba balle a tilastawa mutum ya warwre rantsuwar shi?.

Me ke sa mutum ya fita daga Rantsuwar shi? Abubuwan da suke san ya mutum ya fita daga rantsuwar da ya yi dayan abubuwa uku ne. abu na farko: ya aikata abinda ya rantse zai aikata, ko ya ki aikata abinda ya rantse ba zai aikata ba. abu na biyu: yin dogaciya wato ya fadi In sha Allahu a lokacin da ya yi rantsuwar kamar yadda bayanai suka gabata. Abu na uku kaffara, bayanai na nan na zuwa kan kaffara in Allah ya yarda. Wadan nan abubuwa uku su suke sa mutum ya fita daga rantsuwar da ya yi. Yanzu zamu kawo wadansu misalai na rantsuwa da sukan yawaitu a bakunan mutane muji hukuncin su.

Idan Mutum ya ce in har na auri wance ta saku. Idan mutum ya yi irin wannan maganar sai kuma Allah cikin ikon shi ya kaddari auren to ya sani fa bata sakuba domin Ma'aikin Allah ya ce "Babu alwashi ga Dan-adam cikin abinda ba ya mallaka, kuma babu 'yantawa cikin abinda baya mallaka, kuma babu saki ga Dan-adam cikin dukkanin abinda baya mallaka" Tirmizi ya ruwaito ya kuma ce hadisi ne kyakkyawa.
Idan mutum ya Rantse ba zai sayar ba ko ba zai aurar ba. ida mutum ya yi irin wannan rantsuwar sai kuma ya zo ya aurar ko ya zo ya sayar to zai yi kaffara sai dai idan mijin da aka aurarwa ya ki karba(ma'ana ya ce bai aura ba) ko wanda aka sayarwa ya ce bai saya ba to anan ba wata kaffara akan shi, zamu da kata akan wadannan misalai guda biyu har idan akwai tambaya sai a tuntuba kamar yadda aka saba. Yan zu zamu shiga Magana akan :

Kaffara: ita ce dayan abubuwa uku da mutum zai kubutar da rantsuwar shi da su kamar yadda bayani ya gabata (Ma'ana karya rantsuwa) kuma kada a sha'afa aduk lokacin da ya yi rantsuwa ba zai aikata abu kaza ba sai ya fahimci cewa ya aikata din shine mafi alheri to ya aikata din shi ya fi sai ya yi kaffara kada ya makalkale da cewa ai ya riga ya yi rantsuwa kamar dai yadda bayanai suka gabata, anan musulunci abubuwa uku ya bayyana da cewa sune ake yin kaffara da su(wato karya rantsuwa) wadannan abubuwa kuwa su ne: Ciyarwa, Tufatarwa da 'Yantawa, wadannan abubuwa uku anbaiwa mutum zabi ya zabi wanda yaga dama ya yi kaffara da shi kamar tadda bayanan ko wanne zai zo filla-filla daki-daki in Allah ya yarda sai dai idan bai sami dama ba daga cikin wadannan abubuwa uku sai ya yi Azumini kwana uku. Wadannan abubuwa su ne ake karya rantsuwa da su, amma wata wacce ba wannan ba to ba'a yarda da ita ba kamar ace wai mutum ya kama kaza da ranta ya gatsa wuyanta ko kuma ace akwai wasu gidage su kadai ne suka san yadda ake karya rantsuwa, koda yake galibin irin wannan al'ada tana faruwa ne akan wadanda suke rantsuwa da taurari ko gajimare ko kwarankwatsa abubuwan da akai bayani baya halatta ai rantsuwa da su. Yin kaffara ta hanyar
Ciyarwa : wannan hanya ita ce hanya ta farko daga cikin hanyoyi uku da musulunci ya baiwa mutum zabi domin yin wannan kaffarar, ita wannan ciyarwar mai kaffara zai yi ta ne ga mutane goma miskinai, wato zai ciyar da miskinai goma kuma zai ciyar da sune tsakatakiyar abin da yake ciyar da iyalan shi kamar yadda Allah ya yi bayani cikin Suratul-Ma'ida aya ta 89, shi dai miskini malamai suke ta bayanin shi, shi ne a kullum yana fafutukar abin da za'a ci na ranar wanda inda za'a kwana ana marka-marka zai iya shiga tasku Allah ya sawwake, anan sai muhaimci wanda shara'a take nufi da miskini ba naka-sasshe ba, wato gurhu ko makaho dadai sauran su wadannan ba sune miskinai da shara'a take nufi ba domin zaka iya samun wani naka-sasshen gidaje yake da su ake mishi haya wani kuma mashina sabo da haka ba lalle bane dukkun naka-sasshe ya zama wanda zai shiga cikin wadannan miskinan goma ba, sannan za'a ba kowanne miskini irin abinda ake fitarwa a zakkar kono (zakkar da ake yi bayan kammala azumin Ramadana Fiddakai) idan mutum ya baiwa miskinai goma wannan to ya kammala kaffarar shi. To yanzu ya halatta mutum ya girka abinci ya kira su su ci? Eh, ya halatta hakan ya makada abinci a gidan shi sannan ya gayyato su su zo, sai dai zai yi hakanne a abincin rana dana dare wato sau biyu kenan, kuma ba zai ciyar da wanda ciyar da shi ta zama dole a kan shi ba. kuma kamar yadda bayani ya gabata zai ciyar da tsaka-tsakiyar abinda yake ciyar da iyalan shi ne wato idan gidan shi daga shinkafa-da-miya sai dafa-dika jibi kuma tuwon shinkafa doya sakwara samonbita taliya kuskus, kaga wanna ba zai debo gero ko kaura ya ce wai zai bayar da ita a matsayin kaffara.

Tufatarwa : wannan ko ita ce hanya ta biyu wurin yin kaffarar rantsuwa idan ita mutum ya zaba, ita tufatarwar mai kaffara zai tufatar da mutane goma ne ciccif kamar yadda mai ciyarwa ya ciyar da mutane goman, kuma tufatarwar ta na kasancewane tsakatsakiyar yadda mutum yake wa iyalan shi, sabo da haka sai ya dunkawa kowanne mutum riga da wando cikakke yadi kuma kamar yadda akai bayani tsaka-tsakiyar yadda yakewa iyalan shi, lalle kan musulunci ya dauki matakai da yawa domin kauda fatara domin wadannan mutane goma da akai musu wannan dinki ai an agaza musu, wannan shi ne takaitaccan bayani kan abinda ya shafi kaffara ta hanyar tufatarwa.

'Yanta Baiwa/Bawa: wannan shine wani zabin da musulunci ya bai wa dukkan mutumin da kaffarar Rantsuwa ta kama shi na ya 'yanta Baiwa mumina ko Bawa mummuni wato daga bawa shima ya zama da. Sai dai sharadin da musulunci ya sa shi ne ya zama mummni wato ba zai wadatar ba idan mutum ya 'yanta wanda ba musulmi ba kenan haka kuma malamai suka ce kada ta zama nakasassa kamar yana neman kai da ita kamar makauniya ko gurgu da dai abinda yake nakasa ce bayyananniya, kaga wannan yana daga cikin manyan-manyan hanyoyin da musulunci ya bi domin hana yaduwar bautar da mutane kamar yadda Ma'aikin Allah yake cewa "Babu wani mutum musulmi da zai 'yanta mutum musulmi face sai(shi wanda aka 'yanta din) ko wacce gaba ta zama 'yantar da shi(wanda ya 'yantardin) daga wuta har al'aura da al'aura" Bukhari ya ruwaito shi 2517,6715da Muslim hadisi na 1509.

Azumin kwanaki uku: idan mai yin kaffara bai sami daya daga cikin abubuwa ukunnan ba to sai ya koma zuwa ga yin azumin kunaki uku, rashin samun nashi zai iya kasancewa kodai bai da halin yin wadannan abubuwa ukun saboda babu dudda da cewa malamai sun yi bayanin cewa idan dai zai sami abinda zai ragu bayan abinci kwana guda to ba zai yi azumi ba, koda yake samun wanda baida halin kwata-kwata wata kila ya yi wahala saboda mawuyaci a rasa wadansu 'yankadarori kodai kiwo ko wayar hannu ko dai wata 'yarkadara da ba larura ba ce a rayuwa da mutum zai sargafar da ita domin yin wannan kaffarar, ko kuma yana da halin amma kwata-kwata bai sami miskinin da zai ba ba saboda kowa mawadaci ne wai! to amma idan mutum ya mallaki abinda zai ishe shi yin kaffara amma kuma ana bin shi bashi kwatankwacin abinda ya mallaka din kuma ana bukata ya biya kurkusa kamar Zakkar kono(Zakatul-Fitir) to wannan ba zai yi kaffara da wadan can abubuwa uku ba sai dai ya yi azumi. Idan ba shi da abinda zai yi kaffara da shi a yanzu amma yana saran shugowar wasu kudi bada dadewa to malamai sun yi maganganu biyu wasu sukace ya yi azumi domin bashi da shi a yanzun, Magana ta biyu kuma zai saurara yaga zuwan su sai ya yi kaffarar da su domin ba wani lokaci aka ajiye ba kamar sallah idan mutum bai sami ruwa ba domin tana da lokacin ta. Idan mutum ya fara yin azumi saboda bai sami sarari ba sai da ya fara ya yi daya ko biyu sai kuma ya samu wani budi anan bai zama tilas ya koma dayan wadann can abubuwa uku ba. Allah sarkin iko, Idan lokacin da mutum ya yi rantsuwa yana da abin hannun shi amma yanzu lokacin da zai yi kaffara babu kuma shikenan sai ya yi abinda ya ke da ikon shi a lokacin, ko kuma lokaci yana talakan shi tukuf, amma sai gashi lokacin da zai yi kaffarar yana da abin hannun shi shikenan sai ya yi dayan wadan can abubuwa uku da aka anbata, abin la'akari a nan shi ne halin da mutum ya ke ciki lokacin yin kaffarar ba lokacin da ya yi rantsuwar ba.
Idan mutum ya rasu kafin ya fitar da kaffara, malamai sun yi maganganu kamar haka: za'a fitar da kaffarar daga uwar dukiyar tun kafin a raba gado domin ai hakkin Allah ne kuma hakkin Allah shi ne mafi cancantar abin da za'a biya, wasu kuma suka ce za'a fitar ne idan bai wuce daya bisa uku ba (wato kamar wasiyya ke nan).
Kammalawa: daga dukkanin bayanan da suka gabata ya bayyana a fili yadda musulunci ya kula da rantsuwa domin munga irin yadda ya bata kulawa sosai ta yadda Allah ya saukar da ayoyi a cikin Alkur'ani mai girma domin fayyace wadannan hukunce-hukunce, Sannan kuma Ma'aikin Allah tsira da amincin Allah su tabba a gare shi ya isar kuma ya yi bayanin abinda Allah ya saukar sannan malamai basu yi kasa agwiwa ba suka suka rubuta babi-babi acikin littafan su, a wannan makala ta mu mun yi anfani da Tafsirin Kurdubi a a ya ta 89 cikin suratul Ma'ida hakana da Tafsiri Adhwa'ul-Bayan da kuma littafin Al-Mughni na Ibnu Kudamah juzu'I na 13, kuma mun yi anfani da wadan su littafan amma wadannan kusan sune jigo a wannan Kasida.

Aliyu Muhammad Sadisu,
Kwakungu, bayan Ofishin 'Yansanda Minna, jahar Neja Nijeriya.
Za'a iya tuntuba a +2348020792963, 08064022965, ko kuma a Imei : aliyusadis@gmail.com
Ko a ziyarcemu a yanar gizo, a :
htt:// munbarin-musulunci.blogspot.com

Wasu daga: Manufofin Addinin Musulunci

MUNBARIN-MUSULUNCI.blogspot.com Don bayyana yadda Musulunci ya haskaka mana dukkanin rayuwarmu WASU DAGA CIKIN : MANUFOFIN ADDININ MUSULUNCI !Gabatarwa : Dasunan Allah Mai yawan rahama maiyawai jinkai, tsira da amincin Allah su tabbata ga fiyayyan halittar Allah Annabin tsira Annabi Muhammad, da Iyalan shi da Sahabbanshi baki daya. Bayan mun gabatar da kasidu akan abinda ya shafi Takaba, Rabuwar aure da Idda a musulunci, cikin taimakon Allah Madaukakin sarki yau kuma munzo da wata sabuwar kasidar sai dai ba akan aure ko Takaba takeba, wannan makalar zata bayyana mana wasu daga cikin manya-manyan manufofin addin musulunci, wanda hakan zai nuna mana cewa dukkan wanda ya kallaci addinin musulunci kallo na adalci to kan zai tabbatar da kulawar musulunci ga Bani-adama dama sauran halittun Allah, kuma lalle zai dada bayyana mana cewa musulunci yana da cikakken tsari na tafiyar da dukkanin al'amurammu sannan tsarinsa yana iya tafiyar da duniya bakiyanta, wanda hakamma ya kasance a baya. Anan nake cewa akwai wadansu muhimman abubuwa guda shida da zamu bayya yadda musulunci ya basu kariya sosai da sosai domin sune kashin bayan bil'adama wadda rasa daya daga cikin wadannan abubuwa shida ga mutun a matsayin shi na mutun to lallekan akwai Magana balle ace anrasa daya ko biyu daga cikinsu. Ayanzu mai karatu saiya biyomu sannu a hankali domin bayyanasu daya-bayan daya in Allah ya yarda.
Abu na Daya : Kariya ga Addini.Dan-Adam a yadda Allah ya kaddari halittarShi ga reshi bazai iya rayuwa ba ba tare da bin addini ba na kwaraine ko akasin shi, wannan sai ya nuna mana yadda addini yake da tasiri ga Bil'adama, amma cikin rahamar Allah sai ya sanya addinin Muslunci shi ne addini zababbe kuma karbabbe ingantatte a wurinshi, kuma ya bayyana cewa dukkan wanda ya isa farfajiyar ranar lahira bada wannan addinin ba to tabbas yana cikin masu asara Allah ka tsaremu, Allah yana cewa " Ayau na cika maku Addinin ku, kuma na cika muku ni'ima ta, na yardar muku da musulunci shi ne addini." Suratul-Ma'ida, aya ta : 3, haka kuma Allah yake cewa "Dukka wanda yabi addinin da ba musulunci ba baza'a taba karba ba kuma shi aranar lahira yana cikin masu asara". Suratul-Ali-imran, aya ta : 85, ayoyi masu tarin yawa sunyi bayanin bin addinin musulunci kuma bayanine filla-filla daki-daki, sannan wannnan ya nuna mana shi musulunci ba addini ne na gargajiya ba ta yadda mutun zai'iya wadatuwa da abinda ya taso yaga ana yi a matsayin musulunci ba tare da ya karanta musuluncin a gaban malamai ba, ta inda gargajiya ce mutun zai iya wadatuwa da abinda ya taso yaga ana yi, koma ya ce yanzu ya samu ci gaba da wayewa ba sai ya bi shi, haka zalika ba addini ne na wata kabila ba kadai, wannan gabar tana dakyau mufahimce ta sosai, domin aduniyance wasu na ganin wannan addinin na Larabawa ne alarabawamma na gabas-ta-tsakiya wannan ya sa duk abinda akaiwa musulunci sai ace larabawa na kallo, kuma wannan yasa ake ganin kamar su Allah yaba kulawa da addinin, wanda kowa ya san ba haka bane, wannan ya sake sawa ake nunawa wasu ai al'adallarabawa ne su kuma ba larabawa bane, in kuma a najeriyance ne ace addinin Hausawa ne ko al'adarsu wanda kowa ya san ba haka bane kuma bazai taba zama hakaba. Shi Addinin musulunci addinine na kowa da kowa babu wani wanda aka ware, saboda haka idan za'aikira sai akira dukkanin mutane ba wata al'umma ba kadai, Allah yana cewa " Kace Yaku mutane! Ni Ma'aikin Allah ne zuwa gare ku bakidayan ku" Suratul-A'araf, aya ta :158, haka wurare da yawa ake bude kiran da 'Yaku mutane'! ko kuma 'Ya ku wadanda sukai imani' ba tare da anware wani ba, muma dada fahimtar wannana addini addini ne da ya shafi harduniyar Aljanu, domin ayoyi masu tarin yawa sunyi banin hakan daya-ba-yan daya, daga cikin su akwai sura guda wacce take dauke da bayanin su Al'janudin da al'adun su da kuma yadda wasu suka bar wadannan al'adudin suka musulunta suka shiga yin wa'azi ga wadan da basu musulunta ba. Kuma acikin Suratul-An'am aya ta : 19, Allah yana cewa " Kuma (kace) an yi min wahayin wannan Alkur'anin ne domin In yi muku gargadi da kuma dukkanin wanda (Alkur'anin) ya je masa". Wanna ya nuna babu wani wanda zaice wannan alkur'anin na shi ne ko na kabilar su saboda haka wannan addinin na musulunci addinine na dukkanin wanda ya bi shi, kuma babu wanda zaice shi musulmine amma wani abu na hukun-hukuncen musulunci bai haukanshi ba, sai dai in da larura bashi da lafiya yasha azumi in ya sami sauki ya rama. Hakika Allah ya baiwa wannan addini kariya ta manya-manyan bangarori guda biyu, bangare na farko shine ta waje, bangare na biyu kuma ta ciki, abinnufi da bangare na farko wato ta waje, musulunci ya baiwa kan shi kariya ta yadda bai yadda wani ya ci zarafin shi ba, ko yaki yarda da ai musuluncin ko kuma sanya mishi kowanne irin cikas, sabo da haka aka wajabta Jihadi, domin abaiwa musulunci da musulmai cikakkiyar kariya, domin kamar yadda musulunci bai yadda musulmai su afkawa wadanda ba musulmai ba, to haka musulunci bai yadda a afkawa musulmai ba, Allah (S.W.A) yana cewa "Kuma ku yake su haddai awayi gari babu sauran wata fitina, kuma addini kafdin shi ya zama na Allah ne" Suratul-Anfal, aya ta :39, sannan kuma ba wani sabon abu bane domin duk wani mai wani tsari sai ya baiwa wannan tsarinna shi kowacce irin kariya, ba tare da la'akari da 'yancin daya bangaran ba sabanin musulunci, kai ka san wannan hali da duniya take ciki na yake-yake da karya tattalin arzikin kasashe dan anfi karfinsu ana yin su ne don cimma manufa da kare manufofi wadanda sam musulunci bai goyi bayan haka ba, amma karfi-da- yaji ake tursasa al'umma akan sai sun bi, amma abin mamaki musulunci shi ne abinda kowa ya ke kallo, wai ya yi kaza ya tsara abu iri kaza, kuma tabbas kowa ya shaida in da gwamnatin wata kasa zata dauki nauyin mutun tundaga haihuwar shi har ya yi makarantar Faramari da sakandare yai jami'a, ta samammashi aiki taimai aure, sannan wannan mutumin ya zana yana yiwa wannan gwamnati makarkashiyar ganin bayanta, kai kasan idan ta dankeshi sai an yi mashi kisan da ba'ataba samun irinshi a tarihi ba. saboda haka musulunci ya wajabta hakanne don baiwa kanshi da mabiyanshi kariya. Kariya ta biyu da musulunci ya baiwa kanshi wato ta ciki, ita ce babu kari babu ragi a cikinshi, domin kari da ragi suna cikin manyan al'amuran da suka bata wasu addinai da suka gabata, domin muddin za'ai kari to wata rana za'abar hakikanin abinda yake shi ne musuluncin a kama bin wadannan kare-karen da sunan wai addini ake yi, wannan sai yasa a koma gidan jiya, haka kuma in akace za'a rage to fa zara bata barin dami wata rana sai a wayi gari an bar addinin kwata-kwata Allah ya kiyaye, amin. Akan wannan ne Ma'aikin Allah tsira da amincin Allah su tabbata a gare shi yake cewa "Dukkan wanda ya kago wani abu acikin addininnan na mu wanda babu shi to an mayar mishi" wannan Hadisin Bukhari da Muslim suka ruwaito shi, sanan a farkon wannan makala tamu mun kawo ayar da Allah yake cewa " Ayau na cika muku Addinin ku, kuma na cika muku ni'ima ta, na yardar muku da musulunci shi ne addini." Suratul-Ma'ida, aya ta : 3, wannan ya nuna tunda an cika to babu wurin kari. Sannan yana daga cikin kariyar da akaiwa wannan addini na cewa ba addinin wasa bane saboda haka ba'a yarda mutun ya shiga ya fita ba, idan zai yi ya yi idan kuma yana ganin ba zai iya ba to shikenan, amma ya shiga yau ya fita gobe musulunci sam bai yarda da wannan ba, kuma ya dauki matakai gamsassu don hana guda nuwar irin hakan, Tsar ya tabbata ga Allah ah, baka ganin idan mutun yana wannan jam'iyyar siyasar yau sai ya canza wata gobe, jibi kuma ya fita ya canza wata ko ya koma tada ya 'yan Siyasa zasu ganshi?! Akan haka ne akai bayanin hukunce hukuncan ridda, Allah ya tsare al'ummar musulmi, amin.
Abu na Biyu : kare Rai. Kasancewar Ran Dan-Adam yana da matukar kima kuma zubadda jinin shi ba karamar barna bace a bayan kasa, dubi Suratul-Ma'ida, bayan da Allah ya bada labarin 'ya'yan Annabi Adam su biyu da yadda dayan su ya kashe daya yadda Allah Mai girma da daukaka ya munana al'amarin, sannan ya ce " Saboda haka muka rubutawa Banu-Isra'ila cewa dukkan wanda ya kashe wata rai ba tare da ta kashe rai ba, ko tai barna a bayan kasa to kamar ya kashe mutane ne baki daya, haka kuma dukkan wanda ya rayar da wata rai to kamar ya rayar da mutane ne baki daya" musulunci ya dauki matakai don kare rayuwar bil-adama baki daya, nan da nan musulunci ya shar'anta Kisasi wato ramuwa a kan dukkan wanda ya yi kisan kai da gangan shima a kashe shi, wannan ita ce hanya mafi sauki wurin tabbatar da rayuwar dan-adam, domin dukkan mutumin da ya zaro wuka ko bindiga zai harbi wani ko ya dabama wani ya tabbatar yana kashe shi, shima za'a kashe shi tokan zai aje hannun shi anan an sami rayuwar al'umma, Allah yana cewa " Kuna da cikakkiyar rayuwa wurin yin kisasi (wato ramuwa)" Suratul-Bakara, aya ta : 179, da kuma fadin Allah " Ya ku wadanda sukai imani ! an wajabta muku yin kisasi (ramuwa) cikin dukkanin wadanda aka kashe" Suratul-Bakara, aya ta : 178, wannan ya ke nuna kulawar musulunci ga rayuwar al'umma, domin dukkan wanda yasan in ya kashe za'a kasha shi tokenan babbas zai hakura, kuma wata miza ta musulunci ba banbanci dan babban mutun in ya kashe dan talaka shima sai an dandana mishi kisan Allah ya tsare mu, amin. Sanna idan bincike ya nuna kisan na kuskure ne anan abubuwa biyu sun zama wajibi a kan wanda ya yi kisan: abu na farko ya 'yanta baiwa mumina idan kuma bai samu ba sai ya yi azimin watanni biyu a jere kamar yadda ayar Suratun-Nisa'I aya ta 92, ta yi bayani, anan ba maganar ciyar da miskinai sittin domin kisan kai ne domin in aka ce a ciyar da miskinai da yawa mutane ba zasu ji komai ba, kawai dayan ya 'yanta baiwa mumina in bai samu ba ya dunfari azumin watanni biyu a jere, wannan hakkin Allah kenen, Abu na biyu ya bayar da Diyya ga dangin wanda ya kasha musu dan'uwa, sai dai in sun yafe, anan zamu fahimci cewa ran dan-adan yana da muhimmanci sosai da sosai, kuma yana daga cikin manyan manofin musuunci kare rayuwar dan-adam. Ran dan-adam ya tara hakkoki kamar haka : hakkin wanda aka kashe, hakkin 'yan-uwan shi, hakkin Allah mahaliccin shi, dankari ! anan an sami hakki uku akan dan-dam, ma'ikin Allah yana cewa 'Dukkan mutumin da ya kashe wani, ranar alkiyama sai wanda aka kashe ya shako wuyan wanda da ya kashe shi, yace ya Allah tambaye shi domme ya kashe ni?!" saboda haka kwata-kwata musulunci bai yadda wani ya kashe wani ba, ko kuma mutum ya kashe kan shi, Ma'aikin Allah yana cewa "Dukkan mutumin daya kashe kan shi da kowacce irin wuka to wukar ta shi na hannun shi zai dinga cakawa cikin shi ita ranar alkiyama cikin wutar jahannama yana mai dawwama a cikin ta har abada, kuma dukkan mutumin da ya kashe kan shi da wata guba to gubar nan ta shi tana hannun shi yana kamfatar ta cikin wutar jahannama yana mai dawwama a cikin ta har abada, kuma dukkan mutumin da ya fado daga saman dutse ya kashe kan shi to haka zai dinga gangarawa cikin wutar jahannama mai dawwama a cikin ta har abada". Allah ya sawwake, mutun bashi da hakkin kashe kan shi da kan shi a musulunci, domin ba shi kadai yake da hakkin ba, bayan nashi a kwai na Allah mahaliccin shi a kwai kuma na 'yan-uwan shi (danginshi) kamardai yadda bayanai suka gabata. To yanzu ya kaga wanda zai tara matasa su zama 'yan-bangar shi yace 'su kashe kisan shi ne' Lalle wadannan bayanai suna nuna mana yadda musulunci ya kula da rayuwar al'umma, kuma aka dauki matakan da suka dace da kare rayuwar bil'adama. Yanzu dauki gajeran misali, kalli kisan kuskure, wanda shara'a ta tabbata kuskure ne kallaci irin diyyar da za'a bayar dudda cewa shi kisan kuskure dama babu ramuwa cikin shi saidai bada diyya, irin wannan diyyar lalle zata kawo karshen irin tuki da mugun wasa da dai sauran miyagun dabi'u, wadanda musulunci ya yi tur da su, amma dauki misali yadda ake tuki a kasar nan, ko lodin kaya, gudu wani in ya kama gudu kamar zai tashi sama, wasu direbobin kuma kajan hakuri, dadai sauran al'amura masu bantakaici wadanda tuni musulunci yai maganin abin, zaka ga yadda ake salwantar da rayukan al'umma basu-jiba-basu-ganiba, Allah ya sawwake, amin. Kuma Allah ya baiwa dangin wanda aka kashewa dan'uwa ya basu karfi, akan su tsaya tsayin daka kan hakkin dan'uwansu da aka kashe, sannan kuma ya yi musu alkawarin zai tai maka musu, Allah yana cewa "Dukkan wanda aka kashe shi da zalinci to hakika mun baiwa dangin shi wani karfi, saboda haka kada ai barna wurin kisan, lallekan shi ya kasance wanda za'a taimaka" Suratu-Isra'I, aya ta :33, hakika wadan nan bayanai sun nuna mana manufar addinin musulunci wurin kare rayuwar bil-adama da kuma irin matakan da aka dauka domin tabbatuwar hakan, hakika in dai anbi hakan to kan lalle za'a sami cikakkiyar rayuwa mai aminci, domin kowa ya san yana kashewa za'a kashe shi in gangancine, wannan sai yasa yaiwa kan shi kiyamullali, ya kubutar da rayuwar shi da kuma ta dan'uwan shi, ko kuma yasan zai dandani kudar shi wurin biyan diyya idan kisan kuskure ne, ko ya san zai dandani azaba idan shi ya kashe kanshi-da-kanshi, wannan zaisa don mutun na bakin ciki ko damuwa ba zai katobarar kashe kanshi-da-kanshi ba, balle ya sha guba, ko ya rataye kan shi ko ya hau katuwar gada ya fada, wai don damuwa da bacin rai na nan duniya Allah ya kiyaye mu amin, wani ya ce 'Da kunyar duniya gwanda ta lahira saboda bai san lahirar ba, amma inda ya san lahirar ai ba zai mafarkin fadin hakan ba.
Manufa ta Uku : Kiyaye Hankali. Yana daga cikin manyan manufofin musulunci kiyayewa Dan-adam Hankalin shi, domin hankali bakaramar kima yake da ita ba, wannan nasan ko ba'a kawo ayoyi da hadisai a kan haka ba kowa ya shaida, dan'uwa mai karatu hakika musulunci ya baima hankalin dan-adam hakikanin kulawa ta yadda ya tsaftace shi daga barin dukkan abinda zai gurbata masa hankali, akan wannane musulunci ya haramta dukkan abinda yake gusar da hankali kamar :, Giya, Wiwi, Koken da dukkan wani abu da za'a sarrafa ta kowacce irin hanya muddin yana taba hamkali to haramunne, Ma'aikin Allah yana cewa "Dukkan abinda ke sa maye giya ne, kuma dukkanin giya haramun ce" Bukhari da Muslim suka ruwaito, sannan koda baya sa maye sai an sha da yawa to ko kadan ne haramun ne kamar yadda Ma'aikin Allah yake cewa "Dukkan abinda meyawan shi ya ke sa maye to kadan dinshi ma haramun ne" wannan fa shine hakikanin gatan da musulunci yayi mana, domin yadda giya da mukarrabanta muggan kwayoyi suke cutar da gangar jiki likitoci sun yi ittifaki akan haka da kuma yadda take sanadiyyar aukuwar cututtuka masu hatsarin gasket wasu suna kaiwa ga salwntar rayuwa, yan zu mutum ya sha wadan nan kwayoyi sun yi sana diyyar rasuwar shi haka zai zo ranar kiyama yana kamfatar wadan nan kwayoyi kamar yadda bayanai suka gabata, ga yadda take bata dabi'u, wani yara suyi mishi 'Ta yi Marisa ta sha kafso' wani kuma ya kwararawa iyalin shi fitsari a kwance, wannan ya zama amalala, da kuma yadda take bata hankali ta kurbata tunani, domin kowa yasan wadan su muggan lefukan da ake tafkawa basa yiwuwa cikin cikakken hankali sai an bugu, Allah ya sawwake amin, wannan yasa malamai suka yi sabani kan aukuwar sakin mai-maye idan ya saki matar shi yana cikin ta yi Marisa ta sha kafso. Sabo da haka kamar yadda bayani ya gabata aka haramta dukkan wani abu da akai mai kowacce irin dabara ta yadda ya ke sa maye, ko meye kuwa, koda fura ce akai mata wata dabara ta zama tana sanya maye to ta zama haram, kamar yadda hadisin da mukai bayani ya nuna.
Manufa ta Hudu : Kiyaye Dangantaka. Hakika daga ciki manyan manufofin musulunci kiyaye dangantaka,domin tana da kima da daraja, misali ya mutun zai ji a ce yau ba'asan mahaifin shi ba?! domin kiyaye zuriyar kowa musulunci ya shar'anta Idda domin kada a dauki dan wani gida a kai wani gidan, kamar yadda bayanai suka gabata a makalolimmu, aka shar'anta Takaba, domin zai iya yiwuwa lokacin da mutun ya rabu da iyalinshi kodai ta hanyar saki ko ta rasuwa ya zamana tana da juna-biyu sati daya koma kwana daya, wannan na daga cikin dalilan da suka sa aka tabbatar da iddah da kuma Takaba, sannan domin tabbar da haka aka haramta Zina! Kuma aka dauki tsauraran matakai domin hana aukuwar hakan, in kuma hakan ya auku aka sanya hukuncin da mutun zai yi wuya ya sake anan gaba, domin Zina mummunar dabai'ace tana lalata zamantakewa ta wargatsa al'umma. Daga cikin matakan da aka dauka domin hana aukuwar hakan sune : Hana kadaituwa da macen da ba maharrama ba (wato wacce musulunci ya hana yin aure tsakanin ku kamar uwa, 'ya, kanwa d.s) Ma'aikin Allah yake cewa "Kada dayan ku ya kadaitu da mace lalle sai na ukun su ya kasance Shedan ne" domin kowa yasan tsakanin mace da namiji kamar mayan karfe ne, masu iya Magana na cewa 'maganin kada a ji kada a fara' domin an hana ma yin kusa da ita balle yin ta, Allah yana cewa "Kuma kada ku kusanci zina domin ta kasance alfasha ce kuma mummunar hanya" Suratul-Israi, aya ta : 32, lalle kan ka san kadaituwa da mace a shago ko ofis d.s yana cikin abinda aka hana, amma abin mamaki da takaici mutun yana zaune agari da iyalan shi sai aiki ko kasuwanci ya kaishi wani wuri wai sai abokin shi ya zo wurin matar suna hira da shewa su kadai a daki wai yana debe mata kewa! aannan ba ana cewa don megidan ta bayanan ba za'a ziyarce ta a ji labarin lafiyar su ba, mekuma suke bukata wannan musulunci ya kwadaitar da shi, kuma ya tsara yadda za'a gudanar da hakan yake cewa "Kuma idan zaku tambaye su wadansu abin bukata to ku tambaye su ta bayan shamaki" Suratul-Ahzab, ina jin wannan yasa iyayammu idan za suyi gini sai ayi zaure, kana cikin shi ita kuma tana daga cikin gida. Kuma yana daga cikin matakan da aka dauka aka hana mace ta sanya matsattsun kaya, wanda hakan cikin kankanin lokaci zai canza tunanin Da-namiji, domin kasan ba falwaya ba ne, ma'aikin Allah yake cewa "…Gasu sun sa tufafi kuma tsirara suke suna rangwada, ba za su sami kanshin aljanna ba" haka nan aka hana mutum ya kalli mace ko ta kale shi, kowa ya rintse idon shi, domin ka sani a jikin mace ba wurin yarwa, kuma masana sun ce ba mace mummuna! Domin dukkanin wadannan hanyoyi ne da suke kai mutun su baro cikin kankanin lokaci dama wadanda ba'a an bata ba, kowa ya san su. Kuma musulunci ya sanya Bulala 100 (dari) a kan dukkan saurayin da ya afka cikin wannan danyan aikin, ya sanya kuma hukunci kisa ta hanyar jefewa ga dukkan magidanci da ya afka cikin irin wannan dabi'a, bayan alkali ya tabbar da haka, wannan kuwa shine mafi dacewa, domin dai wannan saurayi wata kila gafin gwaauranta tasa ya afka cikin wannan hali to ana fatan daga wannan bulala ya tuba, ammafa magincin da bai wadatu da iyalan shi ba, harma aka bashi damar yin mata hudu amma bai hakura ba to wannan ya zama annoba cikin al'umma in ba'ai maganin shi ba to zai lalata al'umma baki daya, kamar yadda kasan ana yanke gaba a jikin dan-adam domin kada sutar ta mamaye sauran jikin, to haka al'amari yake dan ba abinda zai sa ya daina in har ya dandana saidai gyaran Allah. Wannan yana daga cikin abinda wasu suke ganin wai ba'a kare hakkin dan-adamba dirkashi! Sun manta irin bakar masifar da zai tsunduma al'umma ciki, yanzu dai bincike ya babbatar da cewa babbar hanyar yaduwar cutar HIV,(kanjamau) ita ce ta hanyar zina, kusan sama da 90% na hanyar yaduwar wannan cuta ita ce ta zina kamar yadda bayani ya gabata, kuma kaga yadda take aikawa da mutane lahira ba kakkautawa, anan ba wai duk mai dauke da wannan cuta wai manemin mata ba ne a'a sam, wata kila ya kamu ne ta sauran hanyoyin da mawuyaci in sunkai 10%, yanzu kana ganin asalin wanda yake dauke da ita da an kammala da shi ai da yanzu cutar bata zo tana kammalawa da al'umma ba, kuma ashelantawa al'umma haramcin Zina anki ance suna da 'yanci !, shi kallon da akewa musulunci akan hukuncin zina bahagon kallo suke yi, ita fa saduwa ko ta hanyar halas ce abin kyamane a ce an ga mutun da iyalinshi a hali iri kaza, balle haram!!, saboda haka wannan hukuncin shi yafi dacewa da shi, kuma in banda shi babu wani hukunci irin shi, ka tuna lokacin da Ma'aikin Allah yake mubaya'a da mata yake gicciya musu sharuddan mubaya'ar daga ciki ya an baci kada suyi zina, adaidai lokacin Hindu ta ce " Ya Ma'aikin Allah ! yanzu 'Ya zatai zina?!!" wanda ya nuna ko azamanin jahiliyya 'ya'ya mata basa zina saidai bayi, kasancewar ta da irin wannan halin kowa yasan lokacin da shugaban kasar Amurka Bill kilantu ya dunga kwarar da zuffa yana amsa tambayoyi kan zargin da ake mishi na ya yi lalata da Munikalawiski, ku kallace su ku kallaci tsarin da suke bi, wanda in da zargin ya tabbata da barin gidan shugaban-kasa zai yi, ai ma nan kasa da shekara guda wani Gwamna na wata jaha a Amurkadin ya sauka saboda irin wannan mummunan halin, saboda irin barnar da take haifarwa
aka dauki matakai domin magance ta akama hana yin kusa da ita kamar yadda bayanai suka gabata, kuma aka shar'anta yin aure domin kowa ya samu natsuwa da abokin zaman shi aka kuma halattawa mutum ya auri mata hudu duka dai dan kaucewa wannan bala'in da kuma tabbatar da ziriya tagari halattacciya tsaftatacciya, amma abin mamaki shi kuma auran muka cika shi da al'adu wadanda musulunci bai sanda su ba, suka kuma zame mana katangar karfe tsakanimmu da auren, domin kai kasan yawan 'yan-mata da zawarawa da ake dasu galibi ba an rasa masu son auran bane, irin tatsar da za'aiwa mutum idan ya je ita ake tsoro, wanda in da za'a sassauto ayo kasa-kasa da an rage adadi mai yawa a kuma kara da wadatar zuci, amma wata budurwar sai ta goya yaro dan shekara shabiyar, in da za'a sami saukin wadannan al'adun sai marasa aure kaga sun fantsama masu daya-daya kuma su kara hakanan masu biyu ko uku, sai a wayi gari an rage adadi masu yawan gaske, Allah ya taimaka mana, amin.
Abu na Biyar : Kare Mutunci. Hakina yana cikin manyan manufofin addinin musulunci kare mutuncin mutane, kamar yadda Ma'aikin Allah ya bayyana a hajjin Shi na bankwana yake cewa "Lalle jinin ku da dukiyoyin ku da mutuncin ku haramun ne…" saboda kare mutuncin mutane aka haramta Gulma, Zunde, Yafice Annamimanci da dukkan munanan dabi'u da suke zubarwa da mutun mutunci, har Allah Madaukakin sarki ya ke bayyana munin Gulma yake cewa "Yanzu dayan ku zai so cin naman dan-uwan sa matacce? Hakika kun kyamaci hakan" Suratul-Hujrat, aya ta :12, aka kuma haramta mana sanya munanan sunaye, sai kaga mutun ga sunan da mahaifin shi ya sanya mishi amma sai ya sanyawa kan shi wani sunan na daban wai sunan gayu. Sabo da kare mutunci aka hana Kazafi kuma a shar'anta hukunci wanda ya dace da dukkan wanda ya aikata wannan mummunan aikin, domin kamar yadda bayani ya gabata akan mummunar dabi'arnan ta lalata haka kawai a wari gari mutun baisan hawaba baisan sauka ba a ce ya aikata wannan aiki ya kake ganin mutuncin shi zai kasan ce a idon mutane, ka ko san mutunci madara ne, saboda haka musulunci ya gindaya sharadin dukkan wanda ya jefi wani da zina to sai ya kawo shaidu hudu, maza, musulmai, kuma baza'a kirga da shiba domin shi maikai kara ne, sannan idan bincike na alkali ya tabbatar da hakan sai aimai hukun zina kamar yadda bayani ya gabata, in kuma bai tabbata ba kowannan su sai ai mai bulala tamani (80), abu na farko kenan, abu na biyu kuma Baza'a sake karbar shedar su ba har'abada, abu na uku kuma Kuma wadannan sune fasikai, sai dai kawai wadanda suka tuba. Mekaratu dubi yadda musulunci yadauki matakai domin kare mutuncin mutun, domin in ba hakaba sai mutuncin ya zama ba abakin komaiba, da kunyi sabani da mutum sai yai ma kaharu amma in yasan akwai bulala 80 a doron bayan shi dole ya shiga taitayinshi, haka kuma aka shar'anta Li'ani (Tsinuwa tsakanin miji da mata) wanda yana kasancewa idan mutum ya jefi matar shi da lalata kuma bai iya kawo shedu hudu kamar yadda mukai bayani adazu ba, ko kuma ya yi musun dan-data Haifa ko take dauke da shi, mace tana da hakkinta ba zai aikata wannan danyar Magana ba a kyale shi, abu na farko ya kawo shedu hudu kamar yadda bayanai suka gabata, idan babu su sai ya yi rantsuwa hudu yana cewa 'Wallahi tallahi billahillazi La'iha illahuwa ta yi zina ko wannan dan ba nashi ba ne ko wannan cikin ba nashi bane' zai maimaita sau hudu sannan ta biyar yace 'idan karya ya yi mata to Tsinuwar Allah ta tabbata akan shi' sannan sai ya koma gefe ita kuma matar ta zo ta rantse kamar yadda ya yi tana cewa 'Wannan dan na shi ne ko wannan cikin na shi ne ko cewa da ya yi ta yi lalata karya ne, haka zata fada bayan kowacce rantsuwa har sai ta yi sau hudu, sannan ta biyar tace 'Idan abinda ya fada gaskiya ne to Fishin Allah ya tabbata akan ta, dankari! Idan kowa ya rantse shikenan sai ajingina dan gareta ace wane dan wance, a takaddun shi na makaranta da komai-da komai na shi, duk wanda yace mishi shege to bulala 80, idan kuma ta ki ta rantse shikenan sai ai mata hukunci masu zina, idan kuma shi mijinne yaki ya rantse sai ya karbi bulala 80 domin ya yi mata kazafi, Allah ya kiyaye amin, amma don rashin sanin kimar mutunci sai mutun ya rubuta takarda ya fitar da wani daga cikin 'ya'yanshi wai ba danshi bane saboda haka ba zai ci gadon shi ba kuma sai ya boye takardar sai bayan mutuwar shi aita kace-na-ce, ba wata Magana yaro gadon shi zai ci, har idan sauran 'ya'yan sun fahimci addini ai bazasu bayyana wannan takardar ba, domin me yasa bai bayyana ba tun yana da rai ya kare kanshi, mutnci fa ba abin wasa bane. Allah ya sawwaka amin.
Abu na Shida : Kare Dukiya. Kasancewar dukiya kashin bayan rayuwa ya kasance yana daga cikin manufofin musulunci baima tukiya kariya, saboda haka aka haramta dukkanin abinda zai gurgunta Tattalin arziki, kamar Sata Caca Fashi-da-makami Riba (bashi-da-ruwa) Cin-hanci-da-rashawa da dukkan wata hanya da shara'a bata yadda da ita ba, aka haramta Tauye mudu (wato dukkan wani abin'awo hatsi ko yadi ko manja ko litar fetur d.s…) kuma musulunci ya halatta kasuwanci domin kusan shi ne babbar hanya ta karuwar tattalin arziki aka kuma hana yaudara da algus da kara baka da dukkan wani salon yaudara nada da na yanzu, aka kuma dauki matakai don ganin an kare dukiyar al'umma, kasancewa afagen sata hannu shine ja-gaba sai akai umarni da idan mutun ya yi sata ta kai nisabi ta kuma cika sharuddan sata da a yanke hannun, don inba hakaba sai mutum guda ya sace abinda mutune dubu-dari zasu rayu da shi ya barsu cikin halin kaka-ni-kayi, aka kuma dauki tsattsauran mataki kan hana fashi-da-makami domin yana jefa al'umma cikin bakin tashin hankali da asarar rayuka da karya tattalin arziki cikin kankani lokaci, aka kuma bayya azaba maibala'in gaske ga maciya Riba wato bashi-da-ruwa, domin karshen rashin tausayi kenan mutun yana cikin halin rai-kwakwai-mutu-kwakwai sannan a kara mishi kan abinda aka bashi bashin shi, domin idan kana lissafa abubuwan da kewa tattalin arziki dukan kawo wuka Riba zata zo ajin farko, kuma kowa ya shaida yadda tattalin arzikin duniya yake tangal-tangal, dudda cewar wasu kasashen sun yanke shawarar rage bashi-da-ruwa daga bankunansu ba wai dan musulunci ya hana ba a'a don dai kawai yana mayar da tattalin arziki baya sosai-da-sosai.
Kammalawa: daga dukkanin bayanan da suka gabata ya bayya afili manufofin Addinin musulunci wadanda malamai suke kiran su da 'Addharuriyyat' wanda ya zama dole al'umma ta samu kariyar wadannan abubuwan, domin da su al'ummar zata sami kafuwa ta kuma zama mai cikakken 'yanci. Sannan wadanda suke ganin ba haka ba to ina ganin tsabagyan adawace da suke yi da addinin ko kuma sun jahilci musuluncin kuma wani abu ya hana su su karanci hakikanin shi, wasu kuma addinin ya je musu ne a baibai saboda haka ya zama wajibi atashi a fahimtar da su hakikanin me nene adddinin, kuma dukkanin wadannan manufofi na musulunci babu wata manufa data keta hakkin Dan-adam, sai idan mutun ne ya keta alfarmar shi, hasalima musulunci bai yadda da keta hakkin dan-adam ba, babban abinda wasu suke gani shi ne hukuncin kisa, wanda wannan gata ne musulunci ya yi wa al'umma, kuma dudu-du abubuwa nawa ne ke sa a zartar da hukuncin kisa a musulunci? Amma ka kalli sauran tsarin da ba musulunci ba, a wata kasarfa cin-hanci hukuncin kisa ne, yaga tutar kasa, cin-amanar kasa, za'a iya tunawa a wasu shekaru da suka wuce aka kashe wasu a Chana saboda sun kashe giwaye! Balle laifin juyin-mulki, dukkan wadannan hukuncin kisa ake zartarwa amma kirga abubuwan da musulunci ya tabbatar musu da hukuncin kisa da kuma yadda alherin haka yake a gare mu, kamar yadda muka ambata shifa mutumin da ya kashe mutun da ganganci idan baku kautar dashi ba daga cikin al'umma to zai zama dan-bindiga-dadi, kuma irin wannan sace-sacen yara da manya da ake yi da yawan kisan kai a gida ko a waje, balle fashi-da-makami dukkan musulunci bai yadda da su ba kuma ya dauki matakan da suka dace da su. Allah ya sawwaka kuma ya zaunar mana da kasarmu lafiya ya kuma nunawa shugabanni abinda yake daidai ya kuma basu ikon bi, amin.

Aliyu Muhammad Sadisu,
Kwakungu, bayan Ofishin 'Yansanda Minna, jahar Neja Nijeriya.
Za'a iya tuntuba a  08064022965,
 ko kuma a Imei : aliyusadis@gmail.com
Ko a ziyarcemu a yanar gizo, a :
htt:// munbarin-musulunci.blogspot.com